මෑතකදී ශ්රී ලංකාවට බලපෑ ‘දිට්වා’ සුළි කුණාටුවෙන් විපතට පත් ජනතාවට සහ බාලදක්ෂයින්ට සහන සැලසීම සඳහා ශ්රී ලංකා බාලදක්ෂ සංගමය සක්රීයව මැදිහත් වී තිබේ. ඒ අනුව පීඩාවට පත් බාලදක්ෂයින් 1,400කට පාසල් පොත් ද, 1,000කට පාවහන් ද ලබා දුන් අතර, නිවාස අලුත්වැඩියාව සහ විදුලිය ලබා ගැනීම සඳහා බාලදක්ෂ නායකයින් 21 දෙනෙකුට මූල්ය ආධාර පිරිනමන ලදී. මීට අමතරව, සුළි කුණාටුව සිදු වූ විගස ක්රියාත්මක වූ බාලදක්ෂයින් පවුල් 15,000කට අධික සංඛ්යාවකට වියළි සලාක, පිරිසිදු කිරීමේ ද්රව්ය, සනීපාරක්ෂක උපකරණ, ඇඳුම් පැළඳුම් සහ ඇඳ ඇතිරිලි ඇතුළු අත්යවශ්ය ද්රව්ය බෙදා දීමට කටයුතු කළහ. බාලදක්ෂයින් විසින් තම අසල්වැසි ප්රදේශවලින් එකතු කරන ලද වියළි සලාකවල වටිනාකම රුපියල් මිලියන 35 ඉක්මවූ බව සංගමය පවසයි.ලෝක බාලදක්ෂ සංවිධානයේ (WOSM) සහ මාලදිවයින් බාලදක්ෂ සංගමයේ දායකත්වයෙන් මෙන්ම දේශීය හා විදේශීය පරිත්යාගශීලීන්ගේ සහයෝගයෙන් මෙම සහන සේවා ක්රියාත්මක විය. සහන කටයුතු සඳහා බාලදක්ෂයින්ට අමතරව වෘත්තීය පුහුණු අධිකාරියේ (VTEC) සිසුන් ද එක් වූ අතර, ඔවුන් නිවාසවල විදුලි පද්ධති, ජංගම දුරකථන සහ ත්රිරෝද රථ අලුත්වැඩියා කිරීමට ස්වේච්ඡාවෙන් ඉදිරිපත් විය. ප්රධාන බාලදක්ෂ කොමසාරිස් නීතිඥ ජනප්රිත් ප්රනාන්දු මහතාගේ මගපෙන්වීම යටතේ ජාතික මූලස්ථානය සහ දිස්ත්රික් බාලදක්ෂ සංගම් එක්ව ආපදා කළමනාකරණ මධ්යස්ථානයේ ද සහය ඇතිව මෙම කටයුතු සම්බන්ධීකරණය කරන ලදී. විපතට පත් ජනතාව පූර්ණ ලෙස යථා තත්ත්වයට පත්වන තෙක් තම සහන සේවා අඛණ්ඩව ක්රියාත්මක කරන බව ශ්රී ලංකා බාලදක්ෂ සංගමය වැඩිදුරටත් අවධාරණය කරයි.
දිට්වා සුළි කුණාටුවෙන් පීඩාවට පත් ජනතාවට සහ සහෝදර බාලදක්ෂයින්ට ශ්රී ලංකා බාලදක්ෂ සංගමයෙන් අතහිත
