දිවයින හරහා පවතින අඩු පීඩන තත්ත්වය හේතුවෙන් අද (නොවැම්බර් 18) දිනයේදී ශ්‍රී ලංකාවේ බොහෝ ප්‍රදේශවලට වලාකුළු සහිත අහසක් අපේක්ෂා කළ හැකි බව කාලගුණ විද්‍යා දෙපාර්තමේන්තුව පවසයි. ඒ අනුව, උතුරු, උතුරු-මැද, නැගෙනහිර, දකුණු සහ ඌව පළාත්වල විටින් විට වැසි හෝ ගිගුරුම් සහිත වැසි ඇති වන අතර, සෙසු ප්‍රදේශවල සවස 1.00 න් පසුව ස්ථාන කිහිපයක වැසි හෝ ගිගුරුම් සහිත වැසි ඇතිවේ. බස්නාහිර, සබරගමුව, වයඹ, දකුණු සහ ඌව පළාත්වලත්, මහනුවර සහ නුවරඑළිය දිස්ත්‍රික්කවලත් ඇතැම් ස්ථානවලට මිලිමීටර් 100 ක් පමණ වූ තද වැසි අපේක්ෂා කළ හැකිය. මේ අතර, දිවයින වටා මුහුදු ප්‍රදේශවල ස්ථාන කිහිපයක වැසි හෝ ගිගුරුම් සහිත වැසි ඇතිවේ. සුළඟ ඊසාන දෙසින් හමන අතර වේගය පැයට කිලෝමීටර් 20-30 ත් අතර වේ. කන්කසන්තුරය සිට ගාල්ල දක්වා මන්නාරම, පුත්තලම සහ කොළඹ හරහා වන මුහුදු ප්‍රදේශවල සුළගේ වේගය විටින් විට පැයට කිලෝමීටර් 40 දක්වා වැඩිවිය හැකිය. කන්කසන්තුරය සිට ගාල්ල දක්වා මන්නාරම, පුත්තලම සහ කොළඹ හරහා වන මුහුදු ප්‍රදේශ විටින් විට මධ්‍යස්ථ ස්වභාවයක් ගනී. දිවයින වටා සෙසු මුහුදු ප්‍රදේශ ස්වභාවයෙන් මදක් රළුය. ගිගුරුම් සහිත වැසි ඇති වන අවස්ථාවලදී තාවකාලිකව තද සුළං සහ ඉතා රළු මුහුදු තත්ත්වයන් අපේක්ෂා කළ හැකිය.
දිවයිනේ ප්‍රදේශ රැසකට මි.මී. 100 ඉක්මවූ තද වැසි
