ජාතික ගොඩනැගිලි පර්යේෂණ සංවිධානය (NBRO) විසින් දිස්ත්‍රික්ක 11ක් සඳහා නිකුත් කර තිබූ නායයෑම් අනතුරු ඇඟවීම තවදුරටත් දීර්ඝ කර ඇත. පවතින අධික වර්ෂාපතනය සහ කාලගුණ විද්‍යා දෙපාර්තමේන්තුවේ කාලගුණ අනාවැකි සැලකිල්ලට ගෙන මෙම තීරණය ගත් බව එම සංවිධානයේ ජ්‍යේෂ්ඨ විද්‍යාඥ ආචාර්ය වසන්ත සේනාධීර මහතා සඳහන් කරයි. විශේෂයෙන්ම, ප්‍රදේශ ගණනාවක පදිංචිකරුවන්ට තත්ත්වය පිළිබඳව අවධානයෙන් පසුවන ලෙස දැඩිව දැනුම් දී තිබේ.අනතුරු ඇඟවීමේ දෙවන අදියර (අවදානයෙන් සිටින්න) යටතේ දිස්ත්‍රික්ක තුනක ප්‍රදේශීය ලේකම් කොට්ඨාස කිහිපයක් නම් කර ඇත. ඒ අනුව, මහනුවර දිස්ත්‍රික්කයේ උඩුනුවර සහ උඩුදුම්බර, කෑගල්ල දිස්ත්‍රික්කයේ බුලත්කොහුපිටිය සහ යටියන්තොට, සහ මාතලේ දිස්ත්‍රික්කයේ පල්ලේපොළ සහ අඹගංකෝරළය යන ප්‍රදේශවල ජනතාව වඩාත් සීරුවෙන් සිටිය යුතු බව දැනුම් දී ඇත. මෙම ප්‍රදේශවල පදිංචිකරුවන් හදිසි තත්ත්වයකට මුහුණ දීමට සූදානම්ව සිටිය යුතු වේ.මීට අමතරව, දිස්ත්‍රික්ක රැසකට අයත් තවත් ප්‍රදේශ ගණනාවක් සඳහා අනතුරු ඇඟවීමේ පළමු අදියර (විමසිලිමත්ව සිටින්න) යටතේ දැනුම් දී තිබේ. මේ අතරට බදුල්ල දිස්ත්‍රික්කයේ හල්දුම්මුල්ල සහ ඌවපරණගම, ගාල්ල දිස්ත්‍රික්කයේ නෙළුව, ගම්පහ දිස්ත්‍රික්කයේ අත්තනගල්ල, මහනුවර දිස්ත්‍රික්කයේ දෙල්තොට සහ දොළුව, කෑගල්ල දිස්ත්‍රික්කයේ මාවනැල්ල, රුවන්වැල්ල, අරණායක සහ රඹුක්කන ප්‍රදේශීය ලේකම් කොට්ඨාස ඇතුළත් වේ. එසේම, කුරුණෑගල දිස්ත්‍රික්කයේ අලව්ව සහ රිදීගම, මාතලේ දිස්ත්‍රික්කයේ උකුවෙල, රත්තොට, යටවත්ත, මාතර දිස්ත්‍රික්කයේ පිටබැද්දර, මොනරාගල දිස්ත්‍රික්කයේ මැදගම, නුවරඑළිය දිස්ත්‍රික්කයේ අඹගමුව, හඟුරන්කෙත, වලපනේ සහ රත්නපුර දිස්ත්‍රික්කයේ කලවාන, ඉඹුල්පේ, ඇහැලියගොඩ, වැලිගෙපොළ යන ප්‍රදේශ සඳහා ද විමසිලිමත්ව සිටින ලෙස දන්වා ඇත. මෙම ප්‍රදේශවල ජනතාව ප්‍රවේශම් විය යුතු අතර, නායයෑම් හෝ බෑවුම් කඩා වැටීමේ ලක්ෂණ පිළිබඳව අවධානයෙන් සිටිය යුතු බව NBRO සංවිධානය වැඩිදුරටත් අවධාරණය කරයි.
දිස්ත්‍රික්ක 11කට නායයෑම් අනතුරු ඇඟවීම දීර්ඝ කරයි: ප්‍රදේශ ගණනාවකට අදියර 2 අවදානම!
