පසුගිය දිනක අගමැතිවරිය විසින් හැන්සාට් ගත කළ ලේඛනයක් හරහා ගොවියන් මුහුණ දෙන බරපතල ගැටලුවක් මතුව තිබෙන බවත් රජය ප්‍රකාශ කරන ආකාරයට පොහොර සහනාධාරය හිමි ගොවීන් 996,992ක් සිටින බවත් පොහොර සහනාධාරය ලෙස ඔවුන්ට රු.25000ක් මුදල රු.15000ක් සහ රු.10000ක් ලෙස අදියර 2ක් යටතේ දෙන බවත් මේ වන විට මෙම ගොවීන් අතරින් රු.15000 සහනාධාරය 684,194කට ලැබී ඇති බවත් එනම් 69%ක් බවත් 31%කට එනම් 312,798කට එය අහිමි වී ඇති බවත් මේ රු.15000 සහනාධාරය හිමි සෙසු ගොවීන් 312,798ට එම සහනාධාරය ලබා දෙන දිනය දැන ගැනීමට අවශ්‍ය බවත් විපක්ෂ නායකවරයා පැවසීය.
ජනතාවගේ පත් වූ මහජන නියෝජිතයකු සහ විපක්ෂ නායකවරයා ලෙස රටේ ජනතාව මුහුණ දෙන කාලීන ගැටලු ගැන විසදුම් ලබා ගැනීම උදෙසා රජයට ඉදිරිපත් කිරීම වගකීමක් වුවත් පාර්ලිමේන්තු සභා ගර්භයේ දී කාලීන ගැටලු ඉදිරිපත් කිරීමේ අවස්ථාවන් අහිමි වීම නිසා පාර්ලිමේන්තුවේ විපක්ෂ නායක කාර්යාලයේ සිට එම ගැටලු රජයට ඉදිරිපත් කිරීමට කටයුතු කරමින් විපක්ෂ නායක සජිත් ප්‍රේමදාස මහතා මේ බව පැවසීය.
එසේම රු.10000 සහනාධාරය ලැබී ඇත්තේ 314,956කට එනම් 32%කට පමණක් බවත් එය ගොවීන් 682,041කට එනම් 68%කට අහිමි වී ඇති බවත් මෙම ඉතිරි රු.10000 සහනාධාරය අහිමි වූ 682,041කට එය ලබා දෙන දිනය දැන ගැනීමට අවශ්‍ය බවත් විපක්ෂ නායකවරයා පැවසීය.
මෙම රු.25000 සහනාධාරය ක්‍රියාත්මක වීමට රු.බිලියන 24.9ක් වැයකර ඇති නමුත් රු.බිලියන 9.9ක් පමණක් එනම් 40%ක් පමණක් කැපකර ඇති බවත් එම නිසා සම්පූර්ණ මුදල වහාම ලබා දෙන ලෙස ඉල්ලා සිටින බවත් විපක්ෂ නායක සජිත් ප්‍රේමදාස මහතා වැඩිදුරටත් පැවසීය.
