ගෝලීය අවිහරණය සහ බහුපාර්ශ්වික සහයෝගීතාව වෙනුවෙන් ශ්රී ලංකාවේ නොසැලෙන කැපවීම විදේශ කටයුතු අමාත්ය විජිත හේරත් මහතා යළිත් වරක් තහවුරු කරයි. ස්විට්සර්ලන්තයේ ජිනීවා නුවර පැවැත්වෙන අවිහරණය පිළිබඳ සම්මේලනයේ (CD) ඉහළ පෙළේ සැසිය අමතමින් අමාත්යවරයා සඳුදා (පෙබරවාරි 23) මෙම අදහස් පළ කළේය. එහිදී ඔහු අවධාරණය කළේ න්යෂ්ටික අවිවලින් තොර කලාප (NWFZs) පිහිටුවීම සඳහා ශ්රී ලංකාව දිගුකාලීනව ලබා දෙන සහයෝගය අඛණ්ඩව පවතින බවත්, විශේෂයෙන්ම මැදපෙරදිග කලාපය තුළ එවැනි කලාප ඇති කිරීම සඳහා ප්රායෝගික ප්රගතියක් අවශ්ය බවත්ය.න්යෂ්ටික අවි භාවිතය වැළැක්විය හැකි එකම සහතිකය වන්නේ එම අවි සම්පූර්ණයෙන්ම තුරන් කිරීම සහ ඒවා ව්යාප්ත වීම නැවැත්වීම පමණක් බව අමාත්යවරයා මෙහිදී පෙන්වා දුන්නේය. න්යෂ්ටික අවි නොමැති රාජ්යයන් සඳහා නීත්යානුකූලව බැඳී පවතින ආරක්ෂක සහතික ලබාදීමේ වැදගත්කම ද ඔහු සිය කතාවේදී අවධාරණය කළේය. ගෝලීය අවිහරණ ක්රියාවලියට ශ්රී ලංකාව ඉතිහාසය පුරා ලබා දී ඇති දායකත්වය සිහිපත් කළ අමාත්යවරයා, 1960 දශකයේ සිට මෙරට දැක්වූ මැදිහත්වීම සහ 1978 දී අවිහරණය පිළිබඳ පළමු විශේෂ සැසිය වෙනුවෙන් ඉටු කළ සුවිශේෂී කාර්යභාරය ද මතු කර දැක්වීය.මීට අමතරව, මානුෂීය බිම් බෝම්බ ඉවත් කිරීම සහ පොකුරු බෝම්බ සම්බන්ධ ජාත්යන්තර සම්මුතීන් ක්රියාත්මක කිරීමේදී ශ්රී ලංකාව දක්වන ක්රියාකාරී දායකත්වය පිළිබඳව ද අමාත්යවරයා කරුණු පැහැදිලි කළේය. ගෝලීය අවිහරණය සහ අවි ව්යාප්තිය පාලනය කිරීමේ ප්රධාන සාකච්ඡා වේදිකාව ලෙස අවිහරණය පිළිබඳ සම්මේලනය ශක්තිමත් කළ යුතු බවත්, ඒ සඳහා නවමු බහුපාර්ශ්වික ප්රවේශයක් අවශ්ය බවත් විජිත හේරත් මහතා වැඩිදුරටත් ඉල්ලා සිටියේය.
න්යෂ්ටික අවිහරණය වෙනුවෙන් ශ්රී ලංකාව ජිනීවාහිදී හඬ අවදි කරයි: විදේශ ඇමති විජිත හේරත්ගෙන් විශේෂ ප්රකාශයක්
