පාර්ලිමේන්තු මන්ත්‍රී විශ්‍රාම වැටුප් (අවලංගු කිරීමේ) පනත් කෙටුම්පත පාර්ලිමේන්තුවේ අනුමැතිය සඳහා ඉදිරිපත් කිරීමට අමාත්‍ය මණ්ඩලය අනුමැතිය ලබා දී ඇත. පාර්ලිමේන්තු මන්ත්‍රීවරුන්ගේ විශ්‍රාම වැටුප් පාලනය කරන 1971 අංක 1 දරන පාර්ලිමේන්තු විශ්‍රාම වැටුප් පනත අවලංගු කිරීම සඳහා ප්‍රතිපත්තිමය අනුමැතිය 2025 ජුනි 16 වැනි දින පැවති කැබිනට් රැස්වීමේදී ලබා දී තිබුණි. “සෞභාග්‍යවත් රටක් – සුන්දර ජීවිතයක්” යන රජයේ ප්‍රතිපත්තිමය දැක්මට සහය දැක්වූ සියලුම ශ්‍රී ලාංකිකයන්ට ලබා දුන් පොරොන්දුවට අනුකූලව, තේරී පත් වූ පාර්ලිමේන්තු මන්ත්‍රීවරුන්ට සහ ඔවුන්ගේ කලත්‍රයන්ට හිමි විශ්‍රාම වැටුප් හිමිකම් අවලංගු කිරීම සඳහා නීති කෙටුම්පත් සම්පාදක විසින් කෙටුම්පතක් සකස් කරන ලදී. රජය පවසන පරිදි, කෙටුම්පත් පනත සඳහා නීතිපතිවරයාගේ අනුමැතිය ද ලබාගෙන ඇත. ඒ අනුව, එම පනත් කෙටුම්පත රජයේ ගැසට් පත්‍රයේ පළ කිරීමටත්, ඉන් අනතුරුව පාර්ලිමේන්තුවේ අනුමැතිය සඳහා ඉදිරිපත් කිරීමටත් අධිකරණ අමාත්‍යවරයා ඉදිරිපත් කළ යෝජනාවට කැබිනට් මණ්ඩලය දැන් අනුමැතිය ලබා දී තිබේ.
පාර්ලිමේන්තු මන්ත්‍රී විශ්‍රාම වැටුප් අවලංගු කිරීමේ පනත් කෙටුම්පතට කැබිනට් අනුමැතිය
