ශ්රී ලංකාවේ ප්රධාන පිළිකා කල්තියා හඳුනාගැනීමේ මධ්යස්ථානය අද දින නව පරිශ්රයක ස්ථාපිත කළ බවත්, ඉදිරියේදී මෙවැනි මධ්යස්ථාන දිවයිනේ සෑම දිස්ත්රික්කයකටම ව්යාප්ත කිරීමට සැලසුම් කර ඇති බවත් සෞඛ්ය නියෝජ්ය අමාත්ය හංසක විජේමුණි මහතා ප්රකාශ කළේය. දැනටමත් ප්රධාන රෝහල් හයක මෙවැනි මධ්යස්ථාන ක්රියාත්මක වන අතර, කොළඹ ජාතික රෝහලේ බාහිර රෝගී අංශ (OPD) ගොඩනැගිල්ලේ මෙම නව ඒකකය විවෘත කෙරිණි. රොටරි (Rotary) සංගමයේ සහයෝගයෙන් 2004 වසරේදී ආරම්භ කළ මෙම මධ්යස්ථානය වසර 22ක් තුළ පුද්ගලයින් මිලියනයකට ආසන්න සංඛ්යාවක් පරීක්ෂාවට ලක් කර ඇති අතර, පසුගිය වසරේ පමණක් පිළිකා රෝගීන් 104 දෙනෙකු අලුතින් හඳුනාගෙන ඇත. මෙම මධ්යස්ථානය රජයේ වැඩකරන දිනවල පෙරවරු 8:30 සිට පස්වරු 3:00 දක්වා විවෘතව පවතී.පිළිකා රෝගය ශ්රී ලංකාව තුළ බරපතල සෞඛ්ය අභියෝගයක් වී ඇති බව පෙන්වා දුන් නියෝජ්ය අමාත්යවරයා, දිනකට අලුතින් රෝගීන් 100ක් පමණ වාර්තා වන බවත් 40 දෙනෙකු මිය යන බවත් අවධාරණය කළේය. ආහාර රටාව, පාරිසරික සාධක සහ රසායනික ද්රව්ය භාවිතය මෙයට ප්රධාන හේතු වී ඇති බැවින් රෝගය වළක්වා ගැනීම සඳහා අන්තර් අමාත්යාංශ මට්ටමින් විසඳුම් සෙවීමේ වැදගත්කම ඔහු පෙන්වා දුන්නේය. දැනට යාපනය, මඩකලපුව, බදුල්ල, රත්නපුර සහ මාතර යන ප්රදේශවල ද මෙවැනි මධ්යස්ථාන ක්රියාත්මක වේ. විශේෂයෙන්ම පිරිමින් අතර බහුල මුඛ පිළිකාව සහ කාන්තාවන් අතර බහුල ගැබ්ගෙල හා පියයුරු පිළිකා කල්තියා හඳුනා ගැනීමෙන් පූර්ණ සුවය ලැබීමේ හැකියාව පවතින බව සෞඛ්ය අංශ අවධාරණය කරයි.ලෝක සෞඛ්ය සංවිධානයේ මෙරට නියෝජිත වෛද්ය රාජේෂ් සම්භාජිරාඕ පාණ්ඩව් මහතා ඇතුළු සෞඛ්ය අමාත්යාංශයේ සහ ජාතික රෝහලේ උසස් නිලධාරීන් රැසකගේ සහභාගීත්වයෙන් මෙම සමාරම්භක උත්සවය පැවැත්විණි. මුඛ පිළිකා වළක්වා ගැනීමට දුම්පානය හා මත්පැන්වලින් වැළකීමත්, ගැබ්ගෙල පිළිකා සඳහා HPV එන්නත සහ පරීක්ෂණ (Pap tests) සිදුකර ගැනීමත් අත්යවශ්ය බව මෙහිදී වැඩිදුරටත් සාකච්ඡා කෙරිණි.
පිළිකා කල්තියා හඳුනාගැනීමේ ප්රධාන මධ්යස්ථානය නව පරිශ්රයකට: සෑම දිස්ත්රික්කයකටම ව්යාප්ත කිරීමේ සැලසුම්!
