ශ්‍රී ලංකාවේ පෞද්ගලික සෞඛ්‍ය සේවාවෙහි සාධාරණ මිල නියම කිරීම්, ප්‍රමිතිගත නියාමනය සහ වැඩිදියුණු කළ රෝගී සත්කාරයේ අවශ්‍යතාව උපුටා දක්වමින්, එම සේවාව කඩිනමින් ප්‍රතිසංස්කරණය කරන ලෙසට ඉල්ලා නිකුත් කරන ලද විගණන වාර්තාවක් සම්බන්ධයෙන් සෞඛ්‍ය අමාත්‍යාංශය කනස්සල්ල පළ කර ඇත. මෙම වාර්තාව මඟින් අඛණ්ඩතාව සහ විනිවිදභාවය සහතික කිරීම සඳහා සාධාරණ සහ දැරිය හැකි ගාස්තු ව්‍යුහයක් හඳුන්වා දීමට නිර්දේශ කර ඇති අතර, දිවයින පුරා ඇති සියලුම පෞද්ගලික වෛද්‍ය ආයතන ශ්‍රේණිගත කරන ලෙසද ඉල්ලා තිබේ. තවද, සියලුම ලියාපදිංචි පෞද්ගලික රෝහල් සහ සායන සඳහා ප්‍රමිතීන් සැකසීම, අධීක්ෂණය කිරීම සහ ඇගයීම සඳහා විධිමත් ක්‍රමවේදයක් ස්ථාපිත කරන ලෙසද එයින් යෝජනා කර ඇත. ඊට අමතරව, වෛද්‍ය හා පරිපාලන කාර්ය මණ්ඩලය සඳහා අවම සුදුසුකම් බලාත්මක කිරීම, නිසි පුහුණු ප්‍රමිතීන් පවත්වා ගැනීම සහ රෝගීන්ට සපයනු ලබන සේවාවන්හි ගුණාත්මකභාවය සහතික කිරීමේ වැදගත්කම මෙම විගණන වාර්තාව අවධාරණය කරයි. එමෙන්ම, පෞද්ගලික රෝහල්වලට එරෙහිව මහජන පැමිණිලි ආමන්ත්‍රණය කිරීම සඳහා විධිමත් යාන්ත්‍රණයක් නිර්මාණය කරන ලෙසද එයින් ඉල්ලා ඇත – පැමිණිලි ඉදිරිපත් කිරීමට සහ කාලෝචිත ලෙස සහන සැලසීමට මාර්ගගත වේදිකාවක් (online platform) ඇතුළුව. පෞද්ගලික සෞඛ්‍ය ආයතනවල අධීක්ෂණය සහ නියාමනය දැඩි කිරීමට අමාත්‍යවරයා විශේෂ අවධානයක් යොමු කර ඇති බව ජ්‍යෙෂ්ඨ සෞඛ්‍ය අමාත්‍යාංශ නිලධාරියෙකු පැවසීය.
පෞද්ගලික සෞඛ්‍ය සේවාවට කඩිනමින් ප්‍රතිසංස්කරණ අවශ්‍යයි: සෞඛ්‍ය අමාත්‍යාංශය අවධානයෙන්
