ශ්‍රී ලංකාවේ පෞද්ගලික සෞඛ්‍ය සේවා පද්ධතිය කඩිනමින් ප්‍රතිසංස්කරණය කරන ලෙසට විගණන වාර්තාවක් මගින් ඉල්ලා ඇති අතර, සාධාරණ සහ දැරිය හැකි ගාස්තු ව්‍යුහයක් සහ දිවයින පුරා පෞද්ගලික වෛද්‍ය ආයතන ශ්‍රේණිගත කිරීමක් සිදු කිරීමට නිර්දේශ කර ඇත.මෙම වාර්තාවට අනුව, සියලුම ලියාපදිංචි පෞද්ගලික රෝහල් සහ සායන සඳහා ප්‍රමිති නියම කිරීමට, අධීක්ෂණය කිරීමට සහ ඇගයීමට විධිමත් ක්‍රමවේදයක් සකස් කළ යුතුය.තවද, සේවක බඳවා ගැනීම් සඳහා අවම සුදුසුකම් සහතික කිරීම, නිසි පුහුණු ප්‍රමිතීන් පවත්වා ගැනීම සහ ගුණාත්මක රෝගී සත්කාර සහතික කිරීමේ අවශ්‍යතාව ද මෙහිදී අවධාරණය කර ඇත.විගණන වාර්තාව වැඩිදුරටත් යෝජනා කරන්නේ, බලධාරීන් විසින් මෙම ප්‍රමිති නීතිගත කර බලාත්මක කළ යුතු බවත්, සෞඛ්‍ය සේවා වෘත්තිකයන් බඳවා ගැනීමේදී ජාතික බඳවා ගැනීමේ නිර්ණායක අනුගමනය කරන බවට සහතික විය යුතු බවත්ය.ඊට අමතරව, පෞද්ගලික රෝහල්වලට එරෙහි මහජන පැමිණිලි හැසිරවීමට විධිමත් පද්ධතියක් පිහිටුවීමට ද යෝජනා කර ඇත. පැමිණිලි ඉදිරිපත් කිරීම සඳහා මාර්ගගත වේදිකාවක් (online platform) ඇතුළුව, ජනතාවට කඩිනමින් සහනයක් ලැබෙන බව සහතික කිරීම මෙහි අරමුණයි.පෞද්ගලික සෞඛ්‍ය ආයතන අධීක්ෂණය දැඩි කිරීමට සෞඛ්‍ය අමාත්‍යවරයා විශේෂ අවධානයක් යොමු කර ඇතත්, මෙම නව පද්ධතිය තවමත් ක්‍රියාත්මක කර නොමැති බව සෞඛ්‍ය අමාත්‍යාංශයේ ජ්‍යෙෂ්ඨ නිලධාරියෙකු ප්‍රකාශ කර තිබේ.
පෞද්ගලික සෞඛ්‍ය සේවාවේ විශාල වෙනසක්! – ගාස්තු සාධාරණ කරන්න, රෝහල් ශ්‍රේණිගත කරන්නැයි නිර්දේශ
