බංග්ලාදේශ දේශපාලනයේ යුග පෙරළියක් සිදුකළ එරට ප්රථම කාන්තා අග්රාමාත්යවරිය මෙන්ම බංග්ලාදේශ ජාතිකවාදී පක්ෂයේ (BNP) නායිකාව වූ කලීඩා සියා මහත්මිය අභාවප්රාප්ත වී තිබේ. මියයන විට 80 වන වියේ පසුවූ ඇය කලක පටන් රෝගාතුරව පෞද්ගලික රෝහලක දැඩි සත්කාර ඒකකයේ ප්රතිකාර ලබමින් සිටි බව වාර්තා වේ. ඇයගේ නික්ම යාම දකුණු ආසියානු දේශපාලන ක්ෂේත්රය තුළ දැඩි කතාබහට ලක්වන සිදුවීමක් බවට පත්ව ඇත.පසුගිය නොවැම්බර් මස 23 වනදා සිට රෝහල්ගතව ප්රතිකාර ලැබූ ඇයගේ සෞඛ්ය තත්ත්වය දෙසැම්බර් මස 11 වනදා සිට බෙහෙවින් බරපතල අතට හැරී තිබුණි. ස්වසන අපහසුතා හේතුවෙන් එදින සිට ඇය ජීවත් වූයේ කෘතිම ස්වසන ආධාරක (Ventilator) යන්ත්රවල සහයෙනි. වෛද්යවරුන් උපරිම උත්සාහයක නිරත වුවද ඇයගේ ජීවිතය බේරා ගැනීමට නොහැකි වී ඇති බව බංග්ලාදේශ ආරංචි මාර්ග තහවුරු කරයි.බංග්ලාදේශයේ ප්රජාතන්ත්රවාදය වෙනුවෙන් මෙන්ම එරට ප්රධාන දේශපාලන ප්රවාහයන් මෙහෙයවීමේදී කලීඩා සියා ඉටුකළ මෙහෙය අතිමහත්ය. අග්රාමාත්ය ධුරය හොබවමින් එරට පාලන තන්ත්රය තුළ නොමැකෙන සටහනක් තැබූ ඇය, සිය දේශපාලන දිවිය පුරා විවිධ අභියෝග රැසකට මුහුණ දුන් නායිකාවකි. ඇයගේ අභාවය වෙනුවෙන් එරට දේශපාලන පක්ෂ මෙන්ම විදෙස් නායකයින් ද සිය ශෝකය පළකරමින් සිටී.
බංග්ලාදේශයේ පළමු අග්රාමාත්යවරිය කලීඩා දිවියෙන් සමුගනී
