හම්බන්තොට මත්තල රාජපක්ෂ ජාත්‍යන්තර ගුවන් තොටුපළේදී වනජීවී දෙපාර්තමේන්තුවට අයත් විශේෂ කාර්යාලයක් පිහිටුවීමට අමාත්‍ය මණ්ඩලයේ අනුමැතිය හිමි වී තිබේ.මෙම තීරණය ගෙන ඇත්තේ, වන අලි ඇතුළු සතුන් නැවත නැවතත් ගුවන් තොටුපළ පරිශ්‍රයට ඇතුළු වීම සහ පිවිසුම් මාර්ග හරහා ගමන් කිරීම සම්බන්ධ සිද්ධීන්ට ප්‍රතිචාර වශයෙනි. මෙම සත්ත්ව හැසිරීම් හේතුවෙන් ගුවන් තොටුපළ යටිතල පහසුකම්වලට තර්ජන එල්ල වී ඇති අතර ගුවන් තොටුපළ මෙහෙයුම්වලට ද බාධා එල්ල වී තිබේ. එසේම, මෙම හානි හේතුවෙන් ගුවන්තොටුපළ සහ ගුවන් සේවා (ශ්‍රී ලංකා) (පුද්.) සමාගමට සැලකිය යුතු අලුත්වැඩියා වියදම් ද දැරීමට සිදු වී ඇත.අලුතින් පිහිටුවන ලද කාර්යාලය මගින් වනජීවී ගමනාගමනය නිරීක්ෂණය කිරීම හා කළමනාකරණය කිරීම, සත්ත්ව ප්‍රහාර වැළැක්වීම සහ මගීන්ගේ, ගුවන් තොටුපළ කාර්ය මණ්ඩලයේ මෙන්ම ගුවන් තොටුපළ යටිතල පහසුකම්වල ආරක්ෂාව තහවුරු කිරීම කෙරෙහි අවධානය යොමු කරනු ඇත.මෙම පියවර මගින් මෙහෙයුම් ප්‍රමාදයන් අවම කර ගැනීමටත්, ගුවන් තොටුපළේ අඛණ්ඩ ගුවන් සේවා පවත්වාගෙන යාමටත් හැකි වනු ඇතැයි බලධාරීහු අපේක්ෂා කරති.
මත්තල ගුවන් තොටුපොළේ වනජීවී කාර්යාලයක් පිහිටුවීමට කැබිනට් අනුමැතිය
