යෝජිත ‘ත්‍රස්තවාදයෙන් රාජ්‍යය ආරක්ෂා කිරීමේ පනත’ හකුලා ගනු – ශ්‍රී ලංකා වෘත්තීය මාධ්‍යවේදීන්ගේ සංගමය රජයෙන් ඉල්ලයි

වර්තමාන රජය මගින් ප්‍රසිද්ධියට පත් කර ඇති ‘ත්‍රස්තවාදයෙන් රාජ්‍යය ආරක්ෂා කිරීමේ පනත’ (Proposed Protection of the State from Terrorism Act) මගින් මෙරට ප්‍රජාතන්ත්‍රවාදය සහ මූලික මානව හිමිකම් දැඩි තර්ජනයකට ලක්ව ඇති බව ශ්‍රී ලංකා වෘත්තීය මාධ්‍යවේදීන්ගේ සංගමය පවසයි. මෙම පනත හරහා රටේ අතීත අඳුරු යුගයන් නැවත සිහිගන්වන බවත්, පුරවැසියන්ගේ ව්‍යවස්ථාපිත නිදහස සහ ජාත්‍යන්තර මානව හිමිකම් බැඳීම් නොසලකා හරිමින් රාජ්‍ය බලය ඕනෑම වියදමකින් පවත්වාගෙන යාමට රජය උත්සාහ කරන බවත් එම සංගමය අවධාරණය කරයි. නිවේදනයක් නිකුත් කරමින් එම සංගමය පෙන්වා දෙන්නේ, ජාතික ජන බලවේග රජය මෙම පනත් කෙටුම්පත අගෝස්තු මාසයේදී ඉදිරිපත් කිරීමට සූදානම්ව සිටියද, ‘දිට්වා’ සුළි කුණාටුවෙන් පසුව ප්‍රකාශයට පත් කළ හදිසි නීති තත්ත්වයක් යටතේ මෙය එළිදැක්වීම බරපතල කනස්සල්ලට කරුණක් බවයි.​මෙම පනත තුළ අඩංගු ‘ත්‍රස්තවාදය’ පිළිබඳ අර්ථ නිරූපණය අතිශය පුළුල් සහ අපැහැදිලි එකක් බව මාධ්‍යවේදීන්ගේ සංගමය පෙන්වා දෙයි. මේ හරහා සාමකාමී මහජන විරෝධතා පවා අපරාධමය ක්‍රියාවන් ලෙස හංවඩු ගැසීමේ අවදානමක් පවතින බව ඔවුන් පවසයි. එමෙන්ම, නඩු පැවරීමකින් තොරව දීර්ඝ කාලයක් පුද්ගලයන් රඳවා තබා ගැනීමට ඇති හැකියාව සහ පොලිසියට අමතරව ත්‍රිවිධ හමුදාවට හා වෙරළාරක්ෂක බලකායට පුද්ගලයන් අත්අඩංගුවට ගැනීමට බලය පැවරීම මගින් රටේ සිවිල් පාලනය මිලිටරීකරණය වීමට ඉඩ ඇති බවටද එම සංගමය අනතුරු අඟවයි. සංවිධාන තහනම් කිරීම සහ අධි ආරක්ෂිත කලාප ප්‍රකාශයට පත් කිරීම වැනි පුළුල් විධායක බලතල හරහා ඒකාධිපති පාලන රටාවකට මග පෑදෙන බවද එහි සඳහන් වේ.​විශේෂයෙන්ම මෙම පනත මගින් භාෂණයේ සහ ප්‍රකාශනයේ නිදහස මෙන්ම පුද්ගලයන්ගේ පෞද්ගලිකත්වයේ අයිතියද දැඩි ලෙස සීමා කරන බව වෘත්තීය මාධ්‍යවේදීන්ගේ සංගමය සඳහන් කරයි. මාධ්‍යවේදීන්, වෘත්තීය සමිති ක්‍රියාකාරීන් සහ සිවිල් සංවිධාන මර්දනය කිරීමට මෙම නීති රීති අවභාවිත විය හැකි බවත්, ස්වභාවික ව්‍යසනයකින් පීඩා විඳින ජනතාවට මෙවැනි පනතක් පිළිබඳව අර්ථවත් ලෙස මහජන උපදේශන සඳහා දායක වීමට අවස්ථාවක් නොමැති බවත් එම සංගමය පෙන්වා දෙයි. එබැවින්, ප්‍රජාතන්ත්‍රවාදී අගයන් අගය කරන්නේ නම් මෙම පීඩාකාරී පනත වහාම හකුලා ගන්නා ලෙස රජයෙන් ඉල්ලා සිටින ශ්‍රී ලංකා වෘත්තීය මාධ්‍යවේදීන්ගේ සංගමය, මේ සම්බන්ධයෙන් පෙළ ගැසෙන ලෙස සියලු ප්‍රජාතන්ත්‍රවාදී බලවේගවලින් ඉල්ලීමක් කරයි.