රජය සහ සෞඛ්ය අමාත්යාංශය එළඹුණු ලිඛිත එකඟතාවන් දිගින් දිගටම උල්ලංඝනය කිරීමට එරෙහිව තම වෘත්තීය සමිති ක්රියාමාර්ග දැඩි කිරීමට රජයේ වෛද්ය නිලධාරීන්ගේ සංගමය (GMOA) තීරණය කර තිබේ. 2025 දෙසැම්බර් මාසයේදී සෞඛ්ය අමාත්යවරයා ලබාදුන් ලිඛිත පොරොන්දු ඉටු නොකිරීම හේතුවෙන් මෙම තීරණය ගත් බව පෙබරවාරි 16 වනදා නිවේදනයක් නිකුත් කරමින් එම සංගමය සඳහන් කළේය. විශේෂයෙන්ම රෝහල් පද්ධතියේ පවතින මානව සම්පත් හිඟය, යටිතල පහසුකම් දුර්වලතා, වැටුප් විෂමතා සහ දීමනා කප්පාදු කිරීම් සම්බන්ධයෙන් මෙහිදී අවධානය යොමු කර ඇත.රෝහල් තුළ පවතින කාර්ය මණ්ඩල, උපකරණ සහ මූලික පහසුකම් හිඟය හමුවේ වෛද්යවරුන් දැඩි දුෂ්කරතාවන්ට මුහුණ දෙන බව පෙන්වා දෙන GMOA සංගමය, රජය මේ සම්බන්ධයෙන් අනුගමනය කරන්නේ “උද්දච්ච” පිළිවෙතක් බවට චෝදනා කරයි. මේ වන විටත් දිවයින පුරා ක්රියාත්මක වන පරිදි රෝහල්වල නොමැති ඖෂධ සහ පරීක්ෂණ සඳහා බාහිර යොමු සටහන් (Referral notes) නිකුත් කිරීම අත්හිටුවීමටත්, දේශපාලන කණ්ඩායම් සංවිධානය කරන සෞඛ්ය සායනවලින් ඉවත් වීමටත් ඔවුන් පියවර ගෙන ඇත.තවද, අනුමත කාර්ය මණ්ඩලයක් නොමැති අලුතින් විවෘත කළ වාට්ටුවල සේවය කිරීමෙන් වැළකී සිටීමටත්, රෝගීන්ගේ පෞද්ගලිකත්වය සහ ආරක්ෂාව තහවුරු නොවන ස්ථානවල රෝගීන් පරීක්ෂා නොකිරීමටත් වෛද්යවරුන් තීරණය කර තිබේ. මෙම විරෝධතාවයේ තවත් පියවරක් ලෙස, එළඹෙන පෙබරවාරි 18 වනදා සිට සෞඛ්ය වෛද්ය නිලධාරීන් (MOH) විසින් ඩෙංගු, ප්රතිශක්තිකරණ දත්ත සහ මාතෘ හා ළමා සෞඛ්ය ඇතුළු වැදගත් මහජන සෞඛ්ය වාර්තා අමාත්යාංශයට ඉදිරිපත් කිරීමෙන් වැළකී සිටිනු ඇත. රජය කඩිනමින් විසඳුම් ලබා නොදුනහොත් මෙම ක්රියාමාර්ග තවදුරටත් දැඩි කරන බවට සංගමය අනතුරු අඟවයි.
රජයේ වෛද්යවරුන්ගෙන් දැවැන්ත වෘත්තීය සමිති ක්රියාමාර්ගයක්: සෞඛ්ය පද්ධතිය අර්බුදයක!
