කොළඹ ශ්රී ලංකා ටෙනිස් සංගම් ක්රීඩාංගණයේදී දින පහක් පුරා උණුසුම් මුහුණුවරකින් පැවැති BNP Paribas World Team Cup ලෝක කුසලාන ආසියානු කලාපීය තේරීම් තරගාවලිය සාර්ථකව නිමාවට පත් විය. මෙවර තරගාවලියේදී පිරිමි අංශයෙන් කොරියාවත්, කාන්තා අංශයෙන් චීනයත් සිය දක්ෂතා විදහා දක්වමින් ලෝක කුසලාන ප්රධාන තරගාවලිය සඳහා සුදුසුකම් ලබා ගැනීමට සමත් වූහ. ශ්රී ලංකා ටෙනිස් සංගමයේ සභාපති ඉක්බාල් බින් අයිසැක් මහතාගේ ප්රධානත්වයෙන් ජයග්රාහකයින් සඳහා සහතික සහ තිළිණ ප්රදානය සිදු කෙරිණි.පිරිමි අංශයේ තරගකාරීත්වය බෙහෙවින් ඉහළ මට්ටමක පැවති අතර, එහිදී ශ්රී ලංකාව, පාකිස්තානය, ඉන්දියාව, කොරියාව සහ චීන තායිපේ යන රටවල් ජයග්රහණය වෙනුවෙන් සටන් වැදුණි. අවසාන මහා තරගයේදී ශූරතාව දිනා ගැනීමට කොරියානු කණ්ඩායම සමත් වූ අතර, සත්කාරක ශ්රී ලංකා කණ්ඩායමට හිමි වූයේ අනුශූරතාවයයි. ශ්රී ලංකා ක්රීඩකයින් දැක්වූ දක්ෂතා මෙහිදී කාගේත් ඇගයීමට ලක් විය.කාන්තා අංශයේ ශූරතාව වෙනුවෙන් චීනය, ඉන්දියාව, කොරියාව සහ කසකස්ථානය යන රටවල් තරග වැදුණු අතර, එහිදී අපරාජිත දක්ෂතා පෙන්නුම් කළ චීන ක්රීඩිකාවෝ රන් පදක්කම දිනා ගත්හ. කාන්තා අංශයේ අනුශූරතාව හිමි කර ගැනීමට කොරියානු කණ්ඩායම සමත් විය. මෙම තරගාවලිය පුරා පෙන්නුම් කළ ඉහළ ක්රීඩා කෞශල්යය හේතුවෙන් ආසියානු කලාපයේ රෝද පුටු ටෙනිස් ක්රීඩාවේ ප්රගමනය මනාව පිළිබිඹු විය.මෙම තේරීම් තරගාවලියේ ජයග්රාහකයින් වන කොරියානු පිරිමි කණ්ඩායම සහ චීන කාන්තා කණ්ඩායම, එළඹෙන සැප්තැම්බර් මාසයේදී ඇමරිකාවේ ෆ්ලොරිඩා හි පැවැත්වෙන ලෝක කුසලාන අවසන් තරගාවලිය සඳහා ආසියාව නියෝජනය කරමින් සහභාගී වීමට නියමිතය. ශ්රී ලංකාවේදී පැවැති මෙම සාර්ථක සංවිධානය ජාත්යන්තර රෝද පුටු ටෙනිස් ක්ෂේත්රයේ ශ්රී ලංකාවට හිමි තැන තවදුරටත් තහවුරු කිරීමට සමත් විය.
රෝද පුටු ටෙනිස් ලෝක කුසලානයට ආසියාවෙන් චීනය සහ කොරියාව සුදුසුකම් ලබයි!
