තමිල්නාඩු රජයෙන්, ‘දිට්වා’ සුළි කුණාටුවෙන් සහ ඉන් පසු ඇති වූ ගංවතුර හා නාය යෑම්වලින් පීඩාවට පත් ප්රජාවන්ට සහාය වීම සඳහා හදිසි ආධාර රැගත් නෞකාවක් ශ්රී ලංකාව බලා පිටත්ව ගොස් ඇත. අත්යවශ්ය සැපයුම් මෙට්රික් ටොන් 950ක් පටවා ඇති මෙම නෞකාව අද දින තූත්තුකුඩි වරායෙන් පිටත්ව ගිය අතර, එයට ආපදාවට ලක් වූ පවුල් අතර බෙදා හැරීම සඳහා වන ආහාර ද්රව්ය සහ ඇඳුම් ඇතුළත් වේ. මෙම ආධාර නැව්ගත කිරීම තමිල්නාඩු මහ ඇමති එම්. කේ. ස්ටාලින්ගේ උපදෙස් මත සිදු කර ඇත. ශ්රී ලංකාවේ චෙන්නායි නියෝජ්ය මහ කොමසාරිස් කාර්යාලය පවසන පරිදි, අමාත්ය විජිත හේරත්ගේ මඟ පෙන්වීම යටතේ චෙන්නායි හි ශ්රී ලංකා නියෝජ්ය මහ කොමසාරිස් ආචාර්ය ගනේෂනාදන් ගීතිශ්වරන් කළ ඉල්ලීමකට ප්රතිචාර වශයෙන් මෙම භාණ්ඩ තොගය ලබා දී ඇත. මහ ඇමති ස්ටාලින් විසින් අද උදෑසන පැවති උත්සවයකදී මෙම පරිත්යාගය ආචාර්ය ගීතිශ්වරන් වෙත නිල වශයෙන් භාර දෙන ලදී. මෙම අවස්ථාවට තමිල්නාඩු රජයේ නිලධාරීන් සහ ශ්රී ලංකා නියෝජ්ය මහ කොමසාරිස් කාර්යාලයේ නියෝජිතයින් සහභාගී වී තිබේ. මෙම දරුණු කුණාටුව හේතුවෙන් පවුල් දහස් ගණනක් අවතැන් වීමත්, නිවාස, යටිතල පහසුකම් සහ ජීවනෝපායන්ට විශාල හානි සිදුවීමත් නිසා ශ්රී ලංකාවට දිගින් දිගටම ජාත්යන්තර මානුෂීය සහාය ලැබෙමින් පවතී.
ලංකාවට තමිල්නාඩුවෙන් සහන ආධාර
