ලිට්ල් අමායා – ‘See Me, Hear Me’: ලෝක ළමා දිනය සහ ළමා අයිතිවාසිකම් පිළිබඳ සම්මුතියේ සංවත්සරය සමරමින් අලුත් අත්දැකීමක්

ලෝක ළමා දිනය සහ ළමා අයිතිවාසිකම් පිළිබඳ සම්මුතියේ සංවත්සරය සනිටුහන් කරමින්, ලිට්ල් අමායා – ‘See Me, Hear Me’ (මාව දකින්න, මට සවන් දෙන්න) යන තේමාවෙන් යුත්, ළමා අයිතිවාසිකම් පිළිබඳ අන්තර්ක්‍රියාකාරී අත්දැකීම් සහ කලා ප්‍රදර්ශනයක් කොළඹ නෙළුම් කුළුණේදී නිල වශයෙන් විවෘත කරන ලදී. ශ්‍රී ලංකාවේ UNICEF සංවිධානය, පරිවාස හා ළමා ආරක්ෂක සේවා දෙපාර්තමේන්තුව (DPCCS) සහ ජාතික ළමා ආරක්ෂක අධිකාරිය (NCPA) එක්ව ගත් මෙම මුලපිරීම, අද පෙරවරුවේ UNICEF ශ්‍රී ලංකා නියෝජිත එමා බ්‍රිග්හැම් මහත්මිය සහ කාන්තා හා ළමා කටයුතු අමාත්‍යාංශයේ (MoWCA), DPCCS, සහ NCPA හි ජ්‍යෙෂ්ඨ නිලධාරීන්ගේ සහභාගීත්වයෙන් ආරම්භ විය. නෙළුම් කුළුණේ ‘Pixel Bloom’ හි පිහිටා ඇති මෙම ප්‍රදර්ශනය, ළමා අයිතිවාසිකම් විනෝදජනක, ප්‍රවේශ විය හැකි සහ සමීප ආකාරයකින් ජීවමාන කිරීම සඳහා නිර්මාණය කර ඇති අතර, කතන්දර කීම, චලනයන් සහ ක්‍රීඩා පාදක ඉගෙනීම ඒ සඳහා යොදා ගනී. එහිදී ‘ලිට්ල් අමායා’ නම් චරිතයක්, සෑම අයිතිවාසිකමක්ම දැනෙන, දකින සහ අත්විඳින මනඃකල්පිත ලෝකයක් තුළ නරඹන්නන්ව මඟ පෙන්වයි. මෙම අවකාශය තුළ, දරුවන්ට කුතුහලය සහ සංවාදය දිරිමත් කරන අන්තර්ක්‍රියාකාරී තාක්ෂණයන් භාවිත කරමින් ආරක්ෂාව, සහභාගීත්වය සහ අදහස් ප්‍රකාශ කිරීම වැනි තේමා ගවේෂණය කිරීමට අවස්ථාව ලැබේ. මෙම අත්දැකීමට අමතරව, නාගරික මධ්‍යස්ථානවල සිට ග්‍රාමීය වතු දක්වා විවිධ සංස්කෘතික, භාෂාමය සහ සමාජ ආර්ථික පසුබිම්වලින් යුත් ශ්‍රී ලංකාව පුරා දරුවන් විසින් සම නිර්මාණය කරන ලද ස්වයං-ඡායාරූප සහ නිර්මාණාත්මක කලා කෘති 200 කට අධික සංඛ්‍යාවකින් යුත් විචිත්‍රවත් කලා ප්‍රදර්ශනයක් ද මෙහි අන්තර්ගතය. මෙම කලා නිර්මාණ, රට පුරා පැවති වැඩමුළු මගින් බිහි වූ අතර, ඔවුන් කවුද, ඔවුන් තමන්ව දකින්නේ කෙසේද, සහ ඔවුන්ට වැදගත් වන්නේ කුමක්ද යන්න ප්‍රකාශ කිරීමට මෙයින් අවස්ථාව ලැබිණි. සමාරම්භක උත්සවයේදී අදහස් දැක්වූ UNICEF නියෝජිත එමා බ්‍රිග්හැම් මහත්මිය, දරුවන්ට සවන් දීමේ සහ ඔවුන්ගේ අදහස් වැදගත් වන අවකාශයන් නිර්මාණය කිරීමේ වැදගත්කම අවධාරණය කළාය. “සහභාගීත්වය යනු අයිතිවාසිකමකි. අපි දරුවන්ට සවන් දෙන විට, අපි වඩා හොඳ තීරණ ගනිමු,” ඇය පැවසුවාය. තවද, මෙම ප්‍රදර්ශනය දරුවන් සේවාවන් හෝ ආරක්ෂාව ලබන අය පමණක් නොවන බවට මතක් කර දෙන අතර, ඔවුන් තම ලෝකය හැඩගස්වන චින්තකයින්, නිර්මාණකරුවන් සහ හවුල්කරුවන් බවද ඇය වැඩිදුරටත් සඳහන් කළාය. NCPA, DPCCS සහ MoWCA නිලධාරීන් මෙම මුලපිරීම කාලෝචිත වේදිකාවක් ලෙස ඇගයීමට ලක් කළ අතර, එය පවුල්, අධ්‍යාපනඥයින් සහ පුළුල් මහජනතාව අතර ළමා අයිතිවාසිකම් පිළිබඳ දැනුවත්භාවය ප්‍රවර්ධනය කරන අතරම, දරුවන්ගේ පරිකල්පනයේ ශක්තිය සහ ඔවුන්ගේ බලාපොරොත්තු හා සැලකිලි ප්‍රකාශ කිරීමේ හැකියාව ද සමරන බව පෙන්වා දුන්හ. ලිට්ල් අමායා – ‘See Me, Hear Me’ ප්‍රදර්ශනය නොවැම්බර් 24 දක්වා දිනපතා පෙ.ව. 10 සිට ප.ව. 10 දක්වා නෙළුම් කුළුණේ ‘Pixel Bloom’ හිදී විවෘතව පවතී. UNICEF සංවිධානය සහ එහි හවුල්කරුවන්, පවුල්, ගුරුවරුන්, තරුණ කණ්ඩායම් සහ සියලුම ශ්‍රී ලාංකිකයන් වෙත මෙම ප්‍රදර්ශනය නැරඹීමට, අන්තර්ක්‍රියාකාරී ගමන අත්විඳීමට, සහ රට පුරා සිටින දරුවන්ගේ නිර්මාණශීලීත්වය දැක බලා ගැනීමට සාදරයෙන් ආරාධනා කරයි.