වතු කම්කරුවන්ගේ පැමිණීමේ දීමනා ගෙවීම සඳහා රාජ්‍ය අරමුදල් වෙන් කිරීම සම්බන්ධයෙන් විපක්ෂය කරන ප්‍රකාශවලට නීතිමය පදනමක් නොමැති බව විදේශ අමාත්‍ය විජිත හේරත් මහතා ඊයේ (නොවැම්බර් 14) පැවසීය. අමාත්‍යවරයා සඳහන් කළේ, රුපියල් මිලියන 5,000ක් වෙන් කර ඇත්තේ පෞද්ගලික සමාගමක කම්කරුවන්ගේ වැටුප් වැඩි කිරීමට නොව, වැවිලි අමාත්‍යාංශයට බවයි. අයවැය විවාදයට එක්වෙමින් අදහස් දැක්වූ අමාත්‍යවරයා පාර්ලිමේන්තුවට පැවසුවේ, වැවිලි අංශයේ සංවර්ධනය සඳහා අමාත්‍යාංශයට වෙන් කර ඇති අරමුදල් භාවිත කිරීමට වැවිලි අමාත්‍යාංශයට බලතල, හැකියාව සහ නීතිමය පදනම ඇති බවයි. “එයට නීතිමය බාධාවක් නැහැ. එය ශ්‍රේෂ්ඨාධිකරණයේ පවා අභියෝග කළ නොහැක. එවැනි ප්‍රතිපාදන සාමාන්‍යයෙන් සපයනු ලබන්නේ අමාත්‍යාංශ මගිනි. අස්වැසුම දීමනාව පවා ගෙවන්නේ බදු මුදල්වලින්” ඔහු පැවසීය. ඇතැම් විපක්ෂ මන්ත්‍රීවරුන් මෙය ව්‍යාකූල කර ඇති බව පෙන්වා දුන් ඔහු, වතු කම්කරුවන්ගේ වැටුප් වැඩි කිරීමේ යෝජනාවට විපක්ෂ මන්ත්‍රීවරුන් විරුද්ධ වීම ලැජ්ජාවට කරුණක් බව ද පැවසීය. වතු කම්කරුවන්ගේ වැටුප් ඉහළ නැංවීමට පොරොන්දු වෙමින් පසුගිය රජයන් වසර ගණනාවක් තිස්සේ ඔවුන් නොමඟ යවා ඇති බව ද අමාත්‍යවරයා වැඩිදුරටත් සඳහන් කළේය.
වතු කම්කරුවන්ගේ දීමනා සඳහා මුදල් වෙන්කිරීමට නීතිමය බාධාවක් නැහැ – අමාත්‍ය විජිත හේරත්
