ව්යාජ ලෙස සකස් කළ ස්පාඤ්ඤ වීසා බලපත්රයක් උපයෝගී කරගනිමින් කටුනායක ගුවන්තොටුපොළ හරහා විදේශගත වීමට උත්සාහ කළ 27 හැවිරිදි බංග්ලාදේශ ජාතිකයෙකු අද (26) උදෑසන නිලධාරීන්ගේ අත්අඩංගුවට පත් විය. සැකකරු කටාර් ගුවන් සේවයට අයත් යානයකින් පිටත්ව යාම සඳහා ලියකියවිලි ඉදිරිපත් කළ අවස්ථාවේදී ඇති වූ සැකය මත, ගුවන්තොටුපොළ බලධාරීන් විසින් ඔහු දේශසීමා ආවේක්ෂණ ඒකකය වෙත යොමු කර තිබේ.ආගමන විගමන නිලධාරීන් විසින් සිදුකළ නවීන තාක්ෂණික පරීක්ෂාවන්හිදී අනාවරණය වී ඇත්තේ ඔහු සතුව තිබූ වීසා බලපත්රය සූක්ෂ්ම ලෙස සකස් කළ ව්යාජ එකක් බවයි. බංග්ලාදේශයේ පවතින විදේශ වීසා නිකුත් කරන ආයතනයක් හරහා බංග්ලාදේශ මුදලින් ටකා 25,000ක් (ශ්රී ලංකා රුපියල් 63,000ක් පමණ) වැය කර තමන් මෙම ලේඛනය ලබාගත් බව සැකකරු විසින් මූලික ප්රශ්න කිරීම් වලදී පාපොච්චාරණය කර ඇත.අත්අඩංගුවට ගත් සැකකරු සහ ඔහු සතු ලිපිලේඛන සම්බන්ධයෙන් වැඩිදුර පරීක්ෂණ පැවැත්වීම සඳහා ආගමන විගමන නිලධාරීන් විසින් ඔහුව කටුනායක ගුවන්තොටුපොළ අපරාධ පරීක්ෂණ දෙපාර්තමේන්තු ශාඛාව වෙත භාර දී තිබේ. ජාත්යන්තර සංක්රමණ නීති උල්ලංඝනය කරමින් සිදුකිරීමට ගිය මෙම ජාවාරමේ සුලමුල සෙවීමට බලධාරීන් මේ වන විට විමර්ශන පුළුල් කර ඇත.
ව්යාජ ස්පාඤ්ඤ වීසා මගින් යුරෝපයට පනින්න ගිය බංග්ලාදේශිකයෙක් කොටුවෙයි
