වැඩි මිලට සහල් විකුණූ ගම්පහ වෙළෙන්දන්ට ලක්ෂ 3ක දඩ

නියමිත උපරිම සිල්ලර මිල ඉක්මවා සහල් අලෙවි කළ ගම්පහ දිස්ත්‍රික්කයේ වෙළෙඳුන් තිදෙනෙකුට වැලිසර මහේස්ත්‍රාත් අධිකරණය විසින් ඊයේ (ජනවාරි 14) රුපියල් ලක්ෂ තුනක දඩ මුදලක් නියම කරන ලදී. පාරිභෝගික කටයුතු පිළිබඳ අධිකාරිය මගින් පවරන ලද නඩුවලට අදාළව තමන් වරදකරුවන් බව පිළිගැනීමෙන් අනතුරුව, එක් වෙළෙන්දෙකුට රුපියල් 100,000 බැගින් මෙම දඩ මුදල් නියම කර ඇත.​අධිකරණ වාර්තාවලට අනුව, පාරිභෝගික කටයුතු පිළිබඳ අධිකාරිය සිදුකළ වැටලීම්වලදී මෙම මිල උල්ලංඝනය කිරීම් අනාවරණය වී තිබේ. ඒ අනුව ජාඇළ, ඒකල ප්‍රදේශයේ කීරි සම්බා කිලෝවක් රුපියල් 308කට අලෙවි කළ වෙළෙඳසැලකටත්, ජාඇළ පොදු වෙළෙඳපොළේ සම්බා සහල් කිලෝවක් රුපියල් 275කට අලෙවි කළ වෙළෙන්දෙකුටත් සහ කඳාන පල්ලිය පාර ප්‍රදේශයේ කීරි සම්බා කිලෝවක් රුපියල් 280කට අලෙවි කළ වෙළෙඳසැලකටත් මෙලෙස රුපියල් ලක්ෂය බැගින් දඩ නියම විය. පාලන මිල ඉක්මවා කටයුතු කරන වෙළෙඳුන්ට එරෙහිව දැඩි නීතිමය පියවර අඛණ්ඩව ක්‍රියාත්මක කරන බව පාරිභෝගික කටයුතු පිළිබඳ අධිකාරිය වැඩිදුරටත් අවධාරණය කරයි.