රජයේ ගල් අඟුරු ටෙන්ඩර් පටිපාටිය පූර්ණ විනිවිදභාවයකින් සහ නීත්යානුකූලව සිදුකර ඇති බවත්, විපක්ෂය නගන චෝදනා පදනම් විරහිත බවත් නියෝජ්ය අමාත්ය එරංග ගුණසේකර මහතා පවසයි. පසුගිය පාලන සමයන්හිදී තම ගජමිතුරන්ට පමණක් ටෙන්ඩර් සීමා කළ ජාවාරම්කාර කල්ලිවලට මෙවර අවස්ථාව අහිමි වීම නිසා ඔවුන් විවිධ අසත්ය ප්රචාර පතුරුවමින් සිටින බව ඔහු පෙන්වා දුන්නේය. විවෘත තරගකාරී මිල ගණන් කැඳවීම් හරහා නව සැපයුම්කරුවන්ට අවස්ථාව ලැබී ඇති අතර, බලාගාරවල දුම් පරීක්ෂා කරමින් විපක්ෂය සිදු කරන්නේ ජනතාව නොමග යවන දේශපාලන ප්රයෝගයක් බවද අමාත්යවරයා අවධාරණය කළේය.විදුලිබල මණ්ඩලය පෞද්ගලීකරණය කරන බවට පතුරුවන මතයන් ප්රතික්ෂේප කළ අමාත්යවරයා, සිදු කර ඇත්තේ ආයතනය ප්රතිව්යුහගත කර කාර්යක්ෂම සේවාවක් ඇති කිරීම පමණක් බව සඳහන් කළේය. සේවක අයිතිවාසිකම්වලට කිසිදු හානියක් නොවන පරිදි ජනාධිපතිවරයා සමඟ පැවැති සාකච්ඡාවලින් පසු මෙම තීරණ ගෙන ඇති බවත්, මින් පෙර පැවැති රජයන් මෙන් ආයතනය සම්පූර්ණයෙන්ම විකුණා දැමීමට තමන් සූදානම් නැති බවත් ඔහු පැවසීය. අනවශ්ය වියදම් කපා හැර ගුණාත්මක විදුලි සේවාවක් ජනතාවට ලබාදීම මෙහි මූලික අරමුණයි.විපක්ෂ නායකවරයා පාර්ලිමේන්තුවේදී සිදුකරන ප්රකාශ දැඩි විවේචනයට ලක් කළ නියෝජ්ය අමාත්යවරයා, සබ්මැරීන් පිළිබඳ ඔහුගේ කථා අද කුඩා දරුවන්ට පවා විහිළුවක් වී ඇති බව ප්රකාශ කළේය. විපක්ෂය දේශපාලන වශයෙන් බංකොලොත් වී ඇති බැවින් දූෂිත පුද්ගලයන් හා එක්ව රජයට එරෙහිව කුමන්ත්රණය කරන බවත්, ඔවුන්ගේ “දේශපාලන සොහොන් ලකුණු” දැන් පහළ වී ඇති බවත් හෙතෙම සඳහන් කළේය. පදනම් විරහිත කරුණු පවසනවා වෙනුවට වගකීම් සහගත විපක්ෂයක භූමිකාව ඉටු කරන ලෙසද ඔහු එහිදී ඉල්ලා සිටියේය.ලෝක යුද තත්ත්වයන් සහ ගෝලීය බලපෑම් කළමනාකරණය කරමින් රජය ජනතාවාදී පාලනයක් ගෙන යන බවත්, අපරාධකරුවන්ට එරෙහිව නීතිය තදින්ම ක්රියාත්මක කරන බවත් අමාත්යවරයා වැඩිදුරටත් පැවසීය. විශේෂයෙන්ම මේජර් ජෙනරාල් සලේ වැනි පුද්ගලයන් සම්බන්ධයෙන් පවතින නීතිමය ක්රියාමාර්ග පිළිබඳව කරුණු ඉදිරියේදී ඔප්පු වනු ඇති බවත්, කිසිදු දූෂිතයෙකුට රැකවරණය නොදෙන සංස්කෘතියක් වත්මන් රජය තුළ ගොඩනගා ඇති බවත් ඔහු මාධ්ය වෙත අවධාරණය කළේය.
විපක්ෂයේ ‘ටෙන්ඩර් මාෆියාව’ පරාජය කර විදුලි බල ක්ෂේත්රය විධිමත් කළා – නියෝජ්ය අමාත්ය එරංග ගුණසේකර
