ලොව ප්‍රථම ජාතික මට්ටමේ ආනයන සඳහාම වෙන් වූ ප්‍රදර්ශනය වන, චීන ජාත්‍යන්තර ආනයන ප්‍රදර්ශනයේ (CIIE) නවතම සංස්කරණය ඊයේ (බදාදා) ෂැංහයි නුවරදී ආරම්භ විය. අටවන CIIE ප්‍රදර්ශනයේ සහ හොංකියෝ ජාත්‍යන්තර ආර්ථික සමුළුවේ සමාරම්භක උත්සවය අමතමින් චීන අග්‍රාමාත්‍ය ලී ක්වාං මහතා ප්‍රධාන දේශනය පැවැත්වීය. අග්‍රාමාත්‍යවරයා අවධාරණය කළේ, සමානාත්මතාවය සහ අන්‍යෝන්‍ය ප්‍රතිලාභ තහවුරු කිරීමත්, නීත්‍යානුකූල පොදු අවශ්‍යතාවල පදනම තහවුරු කිරීමත්, ජාත්‍යන්තර සාධාරණත්වය සහ යුක්තිය සුරැකීමත් අත්‍යවශ්‍ය බවයි. ජාත්‍යන්තර ආර්ථික හා වෙළඳ ක්ෂේත්‍රවල ගෝලීය පාලන මුලපිරීම ක්‍රියාත්මක කිරීම ප්‍රවර්ධනය කිරීමට සහ ලෝක වෙළඳ සංවිධානය (WTO) කේන්ද්‍ර කරගත් බහුපාර්ශ්වික වෙළඳ පද්ධතිය වැඩිදියුණු කිරීමට සියලු පාර්ශ්වයන් සමඟ එක්ව කටයුතු කිරීමට චීනය කැමැත්තෙන් සිටින බව ලී මහතා එහිදී සඳහන් කළේය. මෑතකදී පැවති 20 වැනි චීන කොමියුනිස්ට් පක්ෂ මධ්‍යම කාරක සභාවේ සිව්වන පූර්ණ සැසිවාරයේදී සම්මත කරන ලද 15 වැනි පස් අවුරුදු සැලැස්ම (2026-2030) සකස් කිරීම සඳහා වන නිර්දේශිත ලේඛනය, ඉදිරි කාලය සඳහා චීනයේ ආර්ථික හා සමාජ සංවර්ධනයට වැඩි ස්ථාවරත්වයක් ලබා දී ඇති බවද ඔහු පැවසීය. චීනය උසස් තත්ත්වයේ සංවර්ධනය ඉදිරියට ගෙන යන බවත්, ගෝලීය ආර්ථික වර්ධනයට නව හා වැදගත් දායකත්වයක් ලබා දෙන බවත් ඔහු පැවසූ අතර, ඉහළ ප්‍රමිතියේ විවෘතභාවය නොසැලී ප්‍රවර්ධනය කිරීමටත්, ආයතනික විවෘතභාවය ස්ථාවරව පුළුල් කිරීමටත්, සේවා අංශයේ විවෘතභාවය කඩිනම් කිරීම සඳහා නියමු වැඩසටහන් දියත් කිරීමටත් රට කටයුතු කරන බව වැඩිදුරටත් පැවසීය.”නව යුගය, හවුල් අනාගතය” තේමාව යටතේ පැවැත්වෙන අටවන CIIE ප්‍රදර්ශනය, එහි ඉතිහාසයේ විශාලතම ප්‍රදර්ශන භූමි ප්‍රමාණයෙන් සහ වාර්තාගත ප්‍රදර්ශක සංඛ්‍යාවකින් සමන්විත වේ. එයට රටවල්, කලාප සහ ජාත්‍යන්තර සංවිධාන 155 කින් විදේශීය ප්‍රදර්ශකයින් 4,108 ක් ආකර්ෂණය කර ඇති අතර, මුළු ප්‍රදර්ශන ප්‍රදේශය වර්ග මීටර් 430,000 ඉක්මවයි. නොවැම්බර් 5 සිට 10 දක්වා පැවැත්වෙන මෙම ප්‍රදර්ශනයේදී නව නිෂ්පාදන, තාක්ෂණයන් සහ සේවා 461ක් ප්‍රථම වරට එළිදැක්වීමට නියමිතය. මේ අතර, හොංකියෝ ජාත්‍යන්තර ආර්ථික සමුළුවේදී ලෝක විවෘතභාවය පිළිබඳ වාර්තාව 2025 සහ ලෝක විවෘතභාවය පිළිබඳ දර්ශකය යන දෙකම නිකුත් කිරීමට නියමිතය.
විශාලතම චීන ජාත්‍යන්තර ආනයන ප්‍රදර්ශනය ෂැංහයි හිදී ඇරඹේ
