පසුගිය දිනවල රටට බලපෑ අයහපත් කාලගුණික තත්ත්වය සහ ආපදා තත්ත්වයන් හේතුවෙන් තාවකාලිකව වසා දමා තිබූ සත්වෝද්යාන දෙපාර්තමේන්තුවට අනුබද්ධ සියලු ආයතන මේ වනවිට යළි ජනතාවට විවෘත කර තිබේ. මෙම ආයතන නැවත විවෘත කිරීමේ පියවර ගෙන ඇත්තේ පසුගිය දෙසැම්බර් මස පළමුවැනි දින සිට බව සත්වෝද්යාන දෙපාර්තමේන්තුව නිවේදනය කරයි. එමගින්, විනෝදාස්වාදය අපේක්ෂා කරන දේශීය මෙන්ම විදේශීය සංචාරකයින්ට නැවතත් සතුන් නැරඹීමේ අවස්ථාව උදා වී ඇත.මෙලෙස මහජනතාව සඳහා යළි විවෘත කරන ලද ස්ථාන අතර, දෙහිවල සත්වෝද්යානය, ඓතිහාසික පින්නවල අලි අනාථාගාරය සහ ඊට අනුබද්ධ පින්නවල සත්වෝද්යානය මෙන්ම රිදියගම සෆාරි උද්යානය ද වේ. මෙම සියලුම ස්ථාන, ස්වභාවික විපත්වලින් ඇති වූ හානි තත්ත්වයන් නිසි ලෙස කළමනාකරණය කිරීමෙන් පසු සුරක්ෂිත තත්ත්වයන් යටතේ විවෘත කර ඇත.අයහපත් කාලගුණයත් සමග ඇති වූ හදිසි තත්ත්වයන් මත, ආරක්ෂක හේතූන් සහ සතුන්ගේ සුරක්ෂිතභාවය තහවුරු කිරීම පිණිස අදාළ ආයතන තාවකාලිකව වසා දැමීමට දෙපාර්තමේන්තුවට සිදුවිය. කෙසේ වෙතත්, මේ වන විට තත්ත්වය සාමාන්යකරණය වී ඇති බැවින්, අදාල ස්ථානවලට පැමිණෙන ජනතාවට බාධාවකින් තොරව විනෝද වීමට හැකි බව සත්වෝද්යාන දෙපාර්තමේන්තුව වැඩිදුරටත් සඳහන් කරයි.
සත්වෝද්යාන හා සෆාරි උද්යාන යළි විවෘතයි!
