වෛද්‍ය හා සිවිල් අයිතිවාසිකම් වෛද්‍යවරුන්ගේ වෘත්තීය සමිති සන්ධානයේ සභාපති විශේෂඥ වෛද්‍ය චමල් සංජීව මහතා 2026 අයවැය දැඩි ලෙස විවේචනයට ලක් කරමින් කියා සිටියේ, මෙම අයවැයෙන් රටේ වෛද්‍ය වෘත්තිකයන් නොසලකා හරිමින් සත්ත්ව සුබසාධනය සඳහා සැලකිය යුතු අරමුදල් වෙන් කර ඇති බවයි. “මේ වසරේ අයවැයෙන් සුනඛයන් ඇතුළු සතුන්ගේ සුබසාධනය සඳහා විශාල මුදලක් වෙන් කර තිබුණත්, තරුණ වෛද්‍යවරුන් සහ විශේෂඥ වෛද්‍යවරුන් රඳවා ගැනීමට හෝ දිරිමත් කිරීමට ප්‍රතිපාදන වෙන් කර නැහැ,” යනුවෙන් වෛද්‍ය සංජීව මහතා පැවසීය. ශ්‍රී ලංකාවේ ප්‍රාථමික සෞඛ්‍ය දර්ශක ජාත්‍යන්තර මට්ටමක පවත්වා ගනිමින්, ග්‍රාමීය රෝහල්වල සිට ප්‍රාථමික සෞඛ්‍ය මධ්‍යස්ථාන දක්වා දහස් ගණනක් සෞඛ්‍ය වෘත්තිකයන් දිවා රෑ වෙහෙස මහන්සි වී වැඩ කරන බව ඔහු සඳහන් කළේය. “මෙවර ඔවුන්ගේ සුබසාධනය කෙරෙහි විශේෂ අවධානයක් යොමු නොකිරීම කණගාටුවට කරුණක්. කුඩා හෝ සහනයක් ලබා දුන්නා නම් එය අගය කරනවා,” යනුවෙන් ඔහු වැඩිදුරටත් පැවසීය. නොමිලේ වාහන බලපත්‍ර වැනි දිරිගැන්වීම් ලබා දීම වෛද්‍යවරුන් රට තුළ රඳවා ගැනීමට උපකාරී වනු ඇති බව ද වෛද්‍ය සංජීව මහතා පැවසීය.
සතුන්ගේ සුබසාධනයට මුදල් වෙන්කර වෛද්‍යවරුන් නොසලකා හැරීම විවේචනයට
