අග්රාමාත්ය ආචාර්ය හරිනි අමරසූරිය මහත්මිය සහ විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා බ්රහස්පතින්දා දින ශ්රී ලංකාව ඩිට්වා සුළි කුණාටුවෙන් පසුව සිදු කරන යථා තත්ත්වයට පත්වීමේ කටයුතු පිළිබඳව විදේශ තානාපති කාර්යාල සහ ජාත්යන්තර සංවිධාන දැනුවත් කළහ. හදිසි අවස්ථා කළමනාකරණය සඳහා කඩිනමින් සහාය දැක්වූ සියලුම හවුල්කරුවන්ට අග්රාමාත්යවරිය සිය ස්තුතිය පළ කළ අතර, මේ වන විට රට ක්ෂණික ප්රතිචාරයේ සිට පූර්ණ පරිමාණයේ යථා තත්ත්වයට පත් කිරීමේ සහ ප්රතිසංස්කරණ ක්රියාවලියට අවතීර්ණ වී ඇති බව ද සඳහන් කළාය. විදුලිය, ජලය, ප්රවාහනය, සෞඛ්ය සේවා සහ විදුලි සංදේශ ඇතුළු සියලුම බලපෑමට ලක් වූ දිස්ත්රික්ක හරහා යළි ස්ථාපිත කිරීම රජයේ ප්රමුඛතා අතර වන බව ඇය පැවසුවාය. පුනරුත්ථාපන සැලසුම් සඳහා මග පෙන්වීම පිණිස සංවර්ධන හවුල්කරුවන් සමඟ පුළුල් අවශ්යතා තක්සේරුවක් මේ වන විට සිදු කෙරෙමින් පවතී. මාර්ග සහ පාලම් ප්රතිසංස්කරණය, වාරිමාර්ග සහ ඇළ මාර්ග ප්රතිසංස්කරණය, ආරක්ෂිත ජල සැපයුම සහ සනීපාරක්ෂක කටයුතු යළි ස්ථාපිත කිරීම සහ විශාල පරිමාණයේ අපද්රව්ය හා සුන්බුන් කළමනාකරණය වැනි ප්රධාන ක්ෂේත්ර සඳහා අග්රාමාත්යවරිය ජාත්යන්තර සහයෝගය ඉල්ලා සිටියාය. ආපදා කළමනාකරණ මධ්යස්ථානයේ අධ්යක්ෂ ජනරාල්වරයා විසින් බලපෑමට ලක් වූ ප්රදේශවල තත්ත්වය සහ මූලික හානි තක්සේරු පිළිබඳව ද නවතම තොරතුරු ඉදිරිපත් කළේය.සංචාරක බලධාරීන් සහ කර්මාන්ත නියෝජිතයින් විසින් වනෝද්යාන, සමුද්ර උද්යාන සහ සංස්කෘතික ආකර්ෂණ ස්ථාන ඇතුළු ප්රධාන සංචාරක ස්ථාන නැවත විවෘත කර ඇති බව වාර්තා කළහ. අතරමං වූ සියලුම සංචාරකයින් ආරක්ෂිතව ඉවත් කර ඇති බවත්, ශ්රී ලංකාවට අඛණ්ඩව සංචාරය කරන ලෙසත්, එය බලපෑමට ලක් වූ ප්රජාවන්ට සෘජුවම උපකාරී වනු ඇති බවත් ඔවුහු දිරිමත් කළහ. තවද, වැඩිදියුණු වන තත්ත්වයන්ට අනුකූලව සංචාරක උපදෙස් යාවත්කාලීන කරන ලෙසට ඔවුහු තානාපති කාර්යාලවලින් ඉල්ලා සිටියහ. තානාපති හා ජාත්යන්තර සංවිධාන නියෝජිතයෝ ශ්රී ලංකාවේ යථා තත්ත්වයට පත් කිරීමේ හා ප්රතිසංස්කරණ කටයුතු සඳහා ඔවුන්ගේ අඛණ්ඩ සහයෝගය සහ දැනට සිදුවෙමින් පවතින හා සැලසුම් කර ඇති ආධාර පිළිබඳව තහවුරු කළහ.
සුළි කුණාටුවෙන් පසු යළි ගොඩනැගීමට ශ්රී ලංකාවෙන් ජාත්යන්තර සහාය ඉල්ලයි
