දිවයිනට බලපෑ දිට්වා සුළි කුණාටුවේ විනාශකාරී බලපෑම හේතුවෙන් තාවකාලිකව වසා දැමීමට සිදුවූ හක්ගල උද්භිද උද්යානය කඩිනමින් නැවත සංචාරකයින් සඳහා විවෘත කිරීමේ අරමුණින් පරිසර නියෝජ්ය අමාත්ය ඇන්ටන් ජයකොඩි මහතා පසුගියදා නිරීක්ෂණ චාරිකාවකට එක්විය. මෙම හදිසි ආපදා තත්ත්වය නිසා උද්යානයට සිදුව ඇති හානි, විශේෂයෙන්ම පවතින නායයාම් අවදානම් තත්ත්වයන් පිළිබඳව මෙහිදී විශේෂ අවධානයක් යොමු කෙරිණි. උද්යානයේ ආරක්ෂාව සහ ස්ථාවරත්වය තහවුරු කරමින් එය යළි පණගැන්වීම සම්බන්ධයෙන් ගත යුතු කෙටි කාලීන හා දිගු කාලීන උපාය මාර්ග ඇමතිතුමා විසින් අදාළ නිලධාරීන් සමඟ සාකච්ඡා කරන ලදී.උද්යානය නැවත විවෘත කිරීම සඳහා අත්යවශ්ය කටයුතු සම්බන්ධව නියෝජ්ය අමාත්යවරයා විසින් අදාළ උපදෙස් සහ ක්රියාත්මක කිරීමේ සැලසුම් නිලධාරීන්ට ලබා දුන්නේය. පවතින භූ විද්යාත්මක අවදානම් කළමනාකරණය කිරීම සඳහා භූ ස්ථාවර කිරීමේ කටයුතු කඩිනම් කිරීම එහි ප්රධාන අංගයකි. මේ සඳහා ජාතික ගොඩනැගිලි පර්යේෂණ ආයතනය (NBRO) සහ අනෙකුත් විශේෂඥ ආයතනවල දැනුම උපයෝගී කරගැනීමට ද නියමිතය. මෙම උත්සාහයන් සාර්ථක වීමත් සමඟම, හක්ගල උද්භිද උද්යානය තවත් දින කිහිපයකින් දේශීය හා විදේශීය සංචාරකයන් වෙනුවෙන් නැවත විවෘත කිරීමට හැකි වනු ඇතැයි අපේක්ෂා කෙරේ.මෙම තීරණාත්මක නිරීක්ෂණ අවස්ථාවට ජාතික ගොඩනැගිලි පර්යේෂණ ආයතනයේ අධ්යක්ෂ කේ. බණ්ඩාර මහතා, නුවරඑළිය දිස්ත්රික්කය නියෝජනය කරන භූවිද්යාඥ බුද්ධික මහතා සහ ජාතික උද්භිද උද්යාන දෙපාර්තමේන්තුවේ ජ්යෙෂ්ඨ නිලධාරීන් ඇතුළු පිරිසක් සහභාගී වූහ. ඔවුන්ගේ සහයෝගීතාවය තුළින් මෙම සුන්දර උද්යානය ඉක්මනින්ම මහජනතාවට විවෘත කිරීමට අවශ්ය පදනම වැටී තිබේ.
හානි වූ හක්ගල උද්භිද උද්යානය යළි විවෘත කිරීමට පියවර!
