2019 පාස්කු ඉරිදා ප්රහාරයට අදාළ විමර්ශන සම්බන්ධයෙන් රාජ්ය බුද්ධි සේවයේ (SIS) හිටපු අධ්යක්ෂ මේජර් ජෙනරාල් (විශ්රාමික) සුරේෂ් සලේ මහතාට එරෙහිව ප්රධාන චෝදනා තුනක් එල්ල වී ඇති බව අපරාධ පරීක්ෂණ දෙපාර්තමේන්තුව (CID) කොටුව මහේස්ත්රාත් අධිකරණයට දැනුම් දී තිබේ. අධිකරණයට වැඩිදුර වාර්තාවක් ඉදිරිපත් කරමින් CIDය සඳහන් කළේ, වවුනතිව් පොලිස් නිලධාරීන් ඝාතනය සහ සයින්දමරුදු පිපිරීම සම්බන්ධ විමර්ශන නොමඟ යැවීමේ චෝදනා මත ත්රස්තවාදය වැළැක්වීමේ පනත යටතේ සැකකරුවෙකු ලෙස ඔහුව රඳවා තබාගෙන ප්රශ්න කරන බවයි. එමෙන්ම, පාස්කු ප්රහාරයට පෙර කටුවපිටිය පල්ලිය මුස්ලිම් අන්තවාදීන්ට පෙන්වීම සඳහා බුද්ධි තොරතුරුකරුවෙකු යොදාගත් බවටද විමර්ශකයෝ මෙහිදී චෝදනා කළහ.මීට අමතරව, සයින්දමරුදු පිපිරීමෙන් පසුව ‘සාරා ජැස්මින්’ මියගිය බව තහවුරු කිරීමට පෙර අවස්ථා දෙකකදී සිදුකළ ඩීඑන්ඒ (DNA) පරීක්ෂණ අසාර්ථක වී තිබියදීත්, තෙවැනි පරීක්ෂණයක් පවත්වන ලෙස සුරේෂ් සලේ මහතා විමර්ශකයන්ට බලපෑම් කර ඇති බව අපරාධ පරීක්ෂණ දෙපාර්තමේන්තුව අධිකරණය හමුවේ අනාවරණය කළේය. කෙසේ වෙතත්, සලේ මහතා වෙනුවෙන් පෙනී සිටි නීතිඥයන් මෙම චෝදනා ප්රතික්ෂේප කරමින් කියා සිටියේ පාස්කු ප්රහාරය සිදුවන අවස්ථාවේ හිටපු බුද්ධි ප්රධානියා ශ්රී ලංකාවේ නොසිටි බවත්, ඔහු මැලේසියාවේ රැඳී සිටි බවත්ය. කොටුව මහේස්ත්රාත් ඉසුරු නෙත්තිකුමාර මහතා ඉදිරියේ මෙම නඩුව කැඳවූ අතර, වැඩිදුර වාර්තා ගොනු කරන ලෙස නියෝග කළ මහේස්ත්රාත්වරයා නඩුව නැවත විභාග කිරීම මාර්තු 25 වනදාට නියම කළේය.
හිටපු බුද්ධි ප්රධානී සුරේෂ් සලේට එරෙහිව බරපතල චෝදනා රැසක්!
