චීන ජනාධිපති ෂී ජින්පිං මහතා, ගෝලීය කාන්තා නායිකාවන්ගේ සමුළුවට සහභාගී වීම සඳහා චීනයේ සංචාරයක නිරත වූ අග්‍රාමාත්‍ය හරිනි අමරසූරිය මහත්මිය හමුවිය. මෙම හමුව අඟහරුවාදා බීජිං නුවර මහජන මහා ශාලාවේදී (Great Hall of the People) පැවැත්විණි. එහිදී ජනාධිපති ෂී ජින්පිං මහතා අවධාරණය කළේ, දෙරට අතර සබඳතා සාමකාමී සහජීවනයේ පංච මූලධර්ම මත පදනම් වූ ශක්තිමත් ද්විපාර්ශ්වික සබඳතාවක් පවත්වා ගෙන යන බවයි. ශ්‍රී ලංකාව සහ චීනය “සංවර්ධනය හා පුනර්ජීවනය කරා යන ගමනේදී සමගාමීව ගමන් කරන්නන්” බවත්, චීනයේ අසල්වැසි රාජ්‍යතාන්ත්‍රික කටයුතු අතර ශ්‍රී ලංකාවට ප්‍රමුඛතාවක් හිමිවන බවත් චීන ජනාධිපතිවරයා මෙහිදී නැවතත් තහවුරු කළේය.’එක මාවතක් – එක තීරුවක්’ (BRI) වැඩසටහන යටතේ වරාය ආර්ථිකය, නවීන කෘෂිකර්මය, ඩිජිටල් හා හරිත ආර්ථිකය සහ සංචාරක කර්මාන්තය වැනි ප්‍රධාන අංශ ඔස්සේ ශ්‍රී ලංකාව සමඟ සහයෝගිතාව පුළුල් කිරීමට චීනය කැපවන බව ෂී ජින්පිං ජනාධිපතිවරයා ප්‍රකාශ කළේය. ශ්‍රී ලංකාවේ ස්වෛරීභාවය, ස්වාධීනත්වය සහ භෞමික අඛණ්ඩතාව ආරක්ෂා කර ගැනීමේ උත්සාහයන්ට මෙන්ම, රටට ගැළපෙන සංවර්ධන මාවතක් අනුගමනය කිරීමටත් චීනයේ සහාය නොඅඩුව ලැබෙන බව ඔහු නැවත අවධාරණය කළේය. තවද, දේශසීමා හරහා සිදුවන සූදු හා වංචා වැනි ජාත්‍යන්තර අපරාධ මැඩලීම සඳහා නීතිය ක්‍රියාත්මක කිරීමේ සහ ආරක්ෂක සහයෝගීතාව වැඩිදියුණු කිරීමට ජනාධිපතිවරයා ඉල්ලා සිටියේය.එක්සත් ජාතීන්ගේ සංවිධානය (UN) ඇතුළු බහුපාර්ශ්වික වේදිකාවන්හිදී සහයෝගීතාව තවදුරටත් ගැඹුරු කිරීමට දෙරටේ නායකයෝ එකඟ වූහ. ඔවුන්ගේ අරමුණ වූයේ “සමාන හා ක්‍රමානුකූල බහුධ්‍රැව ලෝකයක්” සහ වඩාත් සමීප ගෝලීයකරණයක් ප්‍රවර්ධනය කිරීමයි. මෙම සාකච්ඡා මගින් අන්‍යෝන්‍ය සංවර්ධනය ඉදිරියට ගෙන යාමට සහ ගෝලීය දකුණේ (Global South) ජාතීන් අතර සහයෝගීතාව ශක්තිමත් කිරීමට දෙරට දක්වන පොදු කැපවීම අවධාරණය කෙරිණි.
චීනයෙන් ශ්‍රී ලංකාවට අඛණ්ඩ සහාය: අගමැති හරිනි සහ ෂී ජින්පිං හමුව
