බන්ධනාගාර පද්ධතිය තුළ මතුව ඇති ගැටලු සඳහා තාවකාලික විසඳුම් ලබාදීම වෙනුවට සමස්ත පද්ධතියම මූලික වශයෙන් ප්රතිසංස්කරණය කිරීමට රජය වහා ඉදිරිපත් විය යුතු බව ශ්රී ලංකා පොදුජන පෙරමුණේ ජාතික සංවිධායක මෙන්ම පාර්ලිමේන්තු මන්ත්රී නාමල් රාජපක්ෂ මහතා අවධාරණය කරයි. කෙටි කාලයක් තුළ බන්ධනාගාරයක් තුළ වාර්තා වූ දෙවන ප්රධාන නොසන්සුන්කාරී තත්ත්වය මෙය බව පෙන්වා දෙන ඔහු, මෙම ගැටලු තවදුරටත් හුදකලා සිදුවීම් ලෙස බැහැර කිරීමට නොහැකි බවත්, එය අයහපත් කළමනාකරණය සහ බන්ධනාගාර පද්ධතිය මුහුණ දී ඇති දැඩි පීඩනයේ සෘජු ප්රතිඵලයක් බවත් සඳහන් කර ඇත.අර්බුදකාරී වාතාවරණයක් හමුවේ වුවද අද වන තෙක් බන්ධනාගාර දෙපාර්තමේන්තුව සඳහා ස්ථිර බන්ධනාගාර කොමසාරිස් ජනරාල්වරයෙකු පත් කර නොමැති වීම බරපතල අඩුපාඩුවක් බව මන්ත්රීවරයා පෙන්වා දෙයි. මෙතරම් තීරණාත්මක සහ සංවේදී තනතුරක් සඳහා නිසි බලතල සහිත ස්ථිර ප්රධානියෙකු මෙතෙක් පත් නොකිරීම තුළින් පද්ධතියේ පවතින දුර්වලතා මනාව පැහැදිලි වන බව ඔහු වැඩිදුරටත් කියා සිටී.අතිරේක ආරක්ෂක බලඇණි යෙදවීම හරහා යම් දිනක තත්ත්වය බාහිරින් පාලනය කරගත හැකි වුවද, එයින් කිසිසේත්ම ගැටලුවට ස්ථිර විසඳුමක් නොලැබෙන බව මන්ත්රීවරයා පෙන්වා දෙයි. බන්ධනාගාර තුළ පවතින අධික සිරකාර තදබදය, මූලික පහසුකම් නොමැතිකම, දුර්වල සෞඛ්ය සේවා මෙන්ම අර්ථවත් සහ ක්රමවත් පුනරුත්ථාපන වැඩපිළිවෙළක් ක්රියාත්මක නොවීම වැනි ගැඹුරු ගැටලු කෙරෙහි බලධාරීන්ගේ අවධානය වහා යොමු විය යුතු බව ඔහු අවධාරණය කර ඇත.
බන්ධනාගාර පද්ධතියට තාවකාලික පැලැස්තර දැමීමෙන් පළක් නැත – නාමල් රාජපක්ෂ
