දිවයින වටා වන මුහුදු ප්රදේශ ඉදිරි පැය 24 තුළ ඉතා රළු විය හැකි බැවින්, ධීවර කටයුතුවලින් වැළකී සිටින ලෙස ධීවර හා ජලජ සම්පත් දෙපාර්තමේන්තුව හදිසි දැනුම්දීමක් කරයි. කාලගුණ අංශ නිකුත් කළ නවතම නිවේදනවලට අනුව මුලතිව්, කන්කසන්තුරය, මන්නාරම, පුත්තලම, කොළඹ, ගාල්ල, හම්බන්තොට සහ පොතුවිල් දක්වා වන වෙරළාශ්රිත මුහුදේ සුළගේ වේගය විටින් විට පැයට කිලෝමීටර් 50 සිට 60 දක්වා ඉහළ යා හැකිය.මේ හේතුවෙන් අදාළ මුහුදු කලාප යාත්රා කිරීම සඳහා අතිශය අවදානම් සහගත මට්ටමක පවතින බව ධීවර දෙපාර්තමේන්තුවේ අධ්යක්ෂ ජනරාල් සුසන්ත කහවත්ත මහතා පවසයි. ඒ අනුව, දැනටමත් මුහුදු ගොස් සිටින ධීවරයින්ට වහාම ආරක්ෂිතව ගොඩබිමට හෝ ආසන්න වරායක් වෙත පැමිණෙන ලෙස හදිසි උපදෙස් නිකුත් කර ඇත.තවද, පවතින අයහපත් කාලගුණික තත්ත්වය හමුවේ ඕනෑම ධීවර කටයුත්තක නිරත වීමේදී ජීවිතාරක්ෂක කබා (Life Jackets) පැළඳ සිටීම අනිවාර්ය බව ද බලධාරීන් අවධාරණය කරයි. සියලුම ධීවර ප්රජාවගෙන් ඉල්ලා සිටින්නේ ඉදිරි කාලගුණ නිවේදන පිළිබඳව දැඩි අවධානයකින් පසුවන ලෙසයි.
මුහුද රළු වීම නිසා ධීවරයින්ට හදිසි අවවාදයක්
