හන්ටාවෛරසය (Hantavirus) ආසාදනය වී ඇතැයි යන සැකය මත ඉතාලියේ දැඩි පරීක්ෂාවට ලක් වූ පුද්ගලයන් සිව්දෙනාටම එම වෛරසය වැළඳී නොමැති බව එරට සෞඛ්ය අමාත්යාංශය අද (13) නිල වශයෙන් තහවුරු කළේය. රෝමය සහ මිලාන් නගරවල රෝහල් කේන්ද්ර කරගනිමින් සිදු කළ විශේෂ වෛද්ය පරීක්ෂණවලින් අනතුරුව මෙම තීරණයට එළඹ ඇති අතර, ඒ අනුව ඉතාලිය තුළ දැනට පවතින වෛරස අවදානම පහව ගොස් ඇත. යුරෝපය පුරා මෙම වෛරසය ව්යාප්ත වීමේ සම්භාවිතාව ඉතා අවම මට්ටමක පවතින බව සෞඛ්ය බලධාරීන් වැඩිදුරටත් අවධාරණය කරයි.මෙම වෛරස සැකය මතු වූයේ විදෙස් රටවල සිට පැමිණි සංචාරකයන් පිරිසක් සහ ඔවුන් සමඟ සබඳතා පැවැත්වූ පුද්ගලයන් කිහිපදෙනෙකු නිව්මෝනියා රෝග ලක්ෂණ පෙන්වීම හේතුවෙනි. ආර්ජන්ටිනාවේ සිට පැමිණි සංචාරකවරියක් මෙන්ම, වෛරසය වැළඳී මියගිය ලන්දේසි ජාතික කාන්තාවක සමඟ ගුවන් ගමන්වලදී සම්බන්ධ වූ බ්රිතාන්ය සහ කැලබ්රියානු ජාතිකයන් මෙලෙස නිරෝධායනයට ලක් කර තිබුණි. කෙසේ වෙතත්, පූර්ව ආරක්ෂණ පියවරක් ලෙස රෝහල්ගත කළ මොවුන් සියලු දෙනාටම වෛරසය ආසාදනය වී නොමැති බව දැන් විද්යාත්මකව තහවුරු වී ඇත.හන්ටාවෛරසයේ මූලාරම්භය ආර්ජන්ටිනාවේ සිට පැමිණි ‘MV Hondius’ නෞකාව ආශ්රිතව හඳුනාගෙන ඇති අතර, මේ වන විට ලෝක සෞඛ්ය සංවිධානය මගින් තහවුරු කළ ආසාදිතයන් සංඛ්යාව 9ක් දක්වා ඉහළ ගොස් තිබේ. මෙම වෛරසය හේතුවෙන් මේ දක්වා ලන්දේසි සහ ජර්මානු ජාතිකයන් තිදෙනෙකු මියගොස් ඇත. ප්රධාන වශයෙන් මීයන් වැනි සතුන්ගෙන් මිනිසාට බෝවන මෙම රෝගයේ ලක්ෂණ වන්නේ අධික උණ සහ තෙහෙට්ටුව වන අතර, සාමාන්යයෙන් රෝගය වැළඳී සති 1ත් 8ත් අතර කාලයකදී මෙම රෝග ලක්ෂණ මතු විය හැකිය.මෙම තත්ත්වය කොවිඩ්-19 (COVID-19) වැනි වසංගත තත්ත්වයක් නොවන බවත්, වෛරසය මිනිසාගෙන් මිනිසාට බෝවීම ඉතා දුර්ලභ බවත් ලෝක සෞඛ්ය සංවිධානය පෙන්වා දෙයි. මේ පිළිබඳව අනවශ්ය බියක් ඇති කර නොගත යුතු බව සඳහන් කරන සෞඛ්ය අංශ, කැනරි දූපත් ආශ්රිතව හඳුනාගත් මෙම රෝගී තත්ත්වය පාලනය කිරීමට අවශ්ය පියවර ගනිමින් සිටී. දැනට වාර්තා වී ඇති සියලුම තොරතුරු අනුව ඉතාලිය සහ අනෙකුත් යුරෝපීය රටවල මහජනතාවට ඉන් සැලකිය යුතු බලපෑමක් එල්ල නොවන බව තහවුරු කර ඇත.
ඉතාලියේ හන්ටාවෛරසය ආසාදනය වී ඇතැයි සැකකළ පුද්ගලයන් සිව්දෙනාටම එම වෛරසය වැළඳී නොමැති බව තහවුරු වෙයි
