පවතින වැසි සහිත කාලගුණික තත්ත්වය හමුවේ ඩෙංගු රෝගීන්ගේ සංඛ්‍යාව නැවත ඉහළ යාමේ අවදානමක් පවතින බව රජයේ වෛද්‍ය නිලධාරීන්ගේ සංගමය (GMOA) අනතුරු අඟවයි. මාධ්‍ය හමුවකට එක්වෙමින් එම සංගමයේ වෛද්‍ය චමිල් විජේසිංහ මහතා අවධාරණය කළේ, ඩෙංගු රෝගය නැවත ව්‍යාප්ත වීම පාලනය කිරීම සඳහා අවශ්‍ය පූර්ව ආරක්ෂිත පියවර ගැනීම අත්‍යවශ්‍ය බවයි. මෙම මාසය ආරම්භයේ සිටම අන්තර්මධ්‍ය කාලීන වැසි පවතින බැවින් මෙම තත්ත්වය ඩෙංගු ව්‍යාප්තියට හේතු විය හැකි බවත්, කීට විද්‍යාත්මක දත්තවලට අනුව මදුරුවන් සහ මදුරු කීටයන්ගේ ගහනයෙහි වර්ධනයක් පෙන්නුම් කරන බවත් ඔහු සඳහන් කළේය. ඩෙංගු රෝගය දීර්ඝකාලීනව පාලනය කිරීම සහ තුරන් කිරීම සඳහා නිවාස, රැකියා ස්ථාන සහ අවට පරිශ්‍ර පිරිසිදුව තබා ගැනීමේ වැදගත්කම පෙන්වා දුන් වෛද්‍ය විජේසිංහ මහතා, ඔක්තෝබර් සහ නොවැම්බර් මාසවල ආරම්භ වන ඊසානදිග මෝසම් කාලගුණය හේතුවෙන් විශේෂයෙන්ම නැගෙනහිර, උතුර සහ උතුරු මැද පළාත්වල ඩෙංගු රෝගීන්ගේ වේගවත් වර්ධනයක් සිදුවිය හැකි බව පැහැදිලි කළේය. පවතින කාලගුණය හමුවේ ඩෙංගු වැළඳීමේ ප්‍රවණතාව සාමාන්‍ය මට්ටමට වඩා ඉහළ ගොස් ඇති බැවින්, රෝගීන් සංඛ්‍යාව හෝ මරණ සංඛ්‍යාව දෙස පමණක් නොබලා, අවම වශයෙන් දිනක් හෝ දෙකක් තම නිවාස සහ සේවා ස්ථාන පිරිසිදු කිරීමට වෙන් කරමින් ඩෙංගු මර්දනය උදෙසා සියලු දෙනා එක්ව කටයුතු කළ යුතු බවද ඔහු වැඩිදුරටත් ඉල්ලා සිටියේය.
වැසි සහිත කාලගුණයත් සමග ඩෙංගු නැවත හිස එසවීමේ අවදානමක්
