අලුත් අවුරුදු නිවාඩුවෙන් පසු නැවත සේවා ස්ථාන කරා පැමිණෙන ජනතාව වෙනුවෙන් විශේෂ ප්රවාහන සේවා අදත් ක්රියාත්මක වේ. ජාතික ගමනාගමන කොමිෂන් සභාවේ සැලසුම් අනුව, පිට පළාත්වල සිට කොළඹට පැමිණෙන මගීන් සඳහා ලබන 20 වනදා දක්වා අතිරේක බස් රථ ධාවනයට එක් කර ඇත. මගී අවශ්යතාව මත එම සේවාවන් තවදුරටත් දීර්ඝ කිරීමට පාලනාධිකාරිය සූදානමින් සිටින අතර, පෞද්ගලික අංශය ද අද දිනයේ බස් රථ 7,000 ක් පමණ ධාවනය කරවමින් සිකුරාදා වන විට සියලු සේවා යථා තත්ත්වයට පත් කිරීමට බලාපොරොත්තු වේ.දුම්රිය ගමනාගමනය ද අද (16) සිට ක්රමිකව සාමාන්ය තත්ත්වයට පත් කිරීමට පියවර ගෙන තිබේ. විශේෂයෙන්ම බෙලිඅත්ත, මාතර සහ ගාල්ල වැනි දකුණු වෙරළබඩ දුම්රිය ස්ථානවල සිට කොළඹ කොටුව බලා උදෑසන කාලයේ අතිරේක දුම්රිය වාර කිහිපයක්ම ක්රියාත්මක වේ. සාගරිකා, රුහුණු කුමාරි සහ ගාලු කුමාරි වැනි ජනප්රිය දුම්රිය සේවාවන් සාමාන්ය කාලසටහනට අනුව ධාවනය කෙරෙන බව දුම්රිය දෙපාර්තමේන්තුව තහවුරු කරයි.කාර්යාල සේවා සඳහා පැමිණෙන පිරිස් වෙනුවෙන් මහව, කුරුණෑගල, රඹුක්කන, පොල්ගහවෙල මෙන්ම හලාවත සහ අවිස්සාවේල්ල යන ප්රදේශවල සිට ද විශේෂ දුම්රිය වාර කිහිපයක් අද දින සිට මගී අවශ්යතාව පරිදි ධාවනය කෙරේ. හෙට දින වන විට සවස් කාලයේ කාර්යාල දුම්රිය සේවා සියල්ල ද සුපුරුදු පරිදි ක්රියාත්මක කිරීමට අවශ්ය කටයුතු යොදා ඇති බැවින්, මගී ජනතාවට බාධාවකින් තොරව සිය ගමන් බිමන් සැලසුම් කරගත හැක.ප්රවාහන අංශ නිවේදනය කරන්නේ නිවාඩුව අවසන් වීමට පෙර කල්වේලා ඇතිව කොළඹට පැමිණීම මගින් ඇතිවිය හැකි තදබදය අවම කරගත හැකි බවයි. පෞද්ගලික බස් රථ හිමියන් පවසන්නේ මගීන්ගේ පැමිණීම මත පදනම්ව සියයට 50 ක ධාරිතාවකින් අද දිනයේ සේවා සපයන බවයි. ඒ අනුව, මගී ඉල්ලුම ඉහළ යාමට පෙර ආරක්ෂිතව සහ කඩිනමින් නගරය කරා පැමිණෙන ලෙස අදාළ බලධාරීන් මහජනතාවගෙන් ඉල්ලා සිටී.
අවුරුදු නිමා වී කොළඹ එන මගීන්ට බස් සහ දුම්රිය සේවා සුදානම්
