කාරක සභා අවස්ථාවේදී සංශෝධන හතරක් ඇතුළත් කිරීමට යටත්ව, ‘ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පත’ පාර්ලිමේන්තුවේ සරල බහුතරයකින් සම්මත කළ හැකි බව ශ්‍රේෂ්ඨාධිකරණය තීරණය කර තිබේ.ආණ්ඩුක්‍රම ව්‍යවස්ථාවේ 121(1) වගන්තිය යටතේ අභියෝගයට ලක් කෙරුණු මෙම පනත් කෙටුම්පත සම්බන්ධයෙන් ශ්‍රේෂ්ඨාධිකරණයේ තීරණය තමා වෙත ලැබී ඇති බව කථානායක වෛද්‍ය ජගත් වික්‍රමරත්න මහතා පාර්ලිමේන්තුවට දැනුම් දුන්නේය.එම තීරණයට අනුව, පනත් කෙටුම්පත සරල බහුතරයකින් සම්මත කර ගැනීමට නම් කාරක සභා අවස්ථාවේදී ඊට සංශෝධන හතරක් එක් කළ යුතුය. යෝජිත සංශෝධනවලින් තුනක් සිදු කිරීමට අතිරේක සොලිසිටර් ජනරාල්වරයා දැනටමත් එකඟතාව පළ කර ඇති බව කථානායකවරයා සඳහන් කළේය.සැකකරුවෙකු පැය 24කට නොවැඩි කාලයක් තවදුරටත් පොලිස් භාරයේ රඳවා තබා ගැනීමට මහේස්ත්‍රාත්වරයෙකු විසින් අවසර දීමට පෙර, විමර්ශනය සිදු කරන පොලිස් නිලධාරියා විසින් ඒ සඳහා ඉල්ලීමක් කිරීම අනිවාර්ය වන පරිදි 26(2) වගන්තිය සංශෝධනය කිරීම මෙම සංශෝධනවලට ඇතුළත් වේ.ඵලදායී අධිකරණ අධීක්ෂණයක් තහවුරු කිරීම සඳහා 59(5)(ආ) වගන්තියේ සඳහන් “අභියාචනාධිකරණය” යන්න වෙනුවට “ශ්‍රේෂ්ඨාධිකරණය” යන්න ආදේශ කරමින් එම වගන්තිය සංශෝධනය කිරීමට ද අධිකරණය යෝජනා කර ඇත.තවද, 60(7) වගන්තිය අනවශ්‍ය වගන්තියක් බව පවසමින් එය පනත් කෙටුම්පතෙන් ඉවත් කිරීමට ශ්‍රේෂ්ඨාධිකරණය නිර්දේශ කර තිබේ.හතරවන සංශෝධනයට අනුව, මෙම පනත යටතේ නිකුත් කරන ලද හෝ සිදු කරන ලද විධායක නියෝගයක්, නියමයක් හෝ විධානයක් ආණ්ඩුක්‍රම ව්‍යවස්ථාවේ 126, 140 හෝ 141 යන වගන්ති යටතේ ගනු ලබන නීතිමය ක්‍රියාමාර්ග මගින් අභියෝගයට ලක් කළ හැකි බවට 66(1) වගන්තිය නැවත සකස් කළ යුතු වේ.ශ්‍රේෂ්ඨාධිකරණයේ සම්පූර්ණ තීරණය පාර්ලිමේන්තුවේ නිල වාර්තාවට (හැන්සාඩ් වාර්තාවට) ඇතුළත් කරන ලෙස කථානායකවරයා වැඩිදුරටත් නියෝග කළේය.
සංශෝධන 4කට යටත්ව ‘ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පත’ සරල බහුතරයකින් සම්මත කළ හැකියි – ශ්‍රේෂ්ඨාධිකරණ තීරණය කථානායක පාර්ලිමේන්තුවට දන්වයි
