2026 වසර මෙරට දූෂිතයන්ට, වංචනිකයන්ට සහ හොරුන්ට එරෙහිව නීතිය තදින්ම ක්රියාත්මක වී ඔවුන්ට සිරගෙවල් නියම වන තීරණාත්මක වසරක් බවට පත් කරන බව ජනාධිපති අනුර කුමාර දිසානායක මහතා අවධාරණය කරයි. මෙවර මැයි දිනය වෙනුවෙන් ජාතික ජන බලවේගය නුවරඑළියේදී සංවිධානය කළ දැවැන්ත ජන රැළිය අමතමින් ජනාධිපතිවරයා මේ බව කියා සිටියේය. මෙරට දේශපාලන ඉතිහාසයේ ප්රථම වතාවට රට පුරා ස්ථාන 21ක මැයි දින රැළි පවත්වමින් ජාතික ජන බලවේගය ලැබූ මෙම ජනතා ආකර්ෂණය රජය කෙරෙහි ඇති ජනතා විශ්වාසය යළි තහවුරු කිරීමක් බවද හෙතෙම මෙහිදී පෙන්වා දුන්නේය.මෙවර ජාතික ජන බලවේගයේ මැයි දින සැමරුම් මාලාවේ සමාරම්භක රැළිය නුවරඑළිය දිස්ත්රික්කය කේන්ද්ර කරගනිමින් පැවැත්වීම විශේෂත්වයකි. විශේෂයෙන්ම මලයගම් ජනතාවගේ අභිමානය සහ ඔවුන්ගේ අයිතීන් වෙනුවෙන් සංවිධානය කළ මෙම රැළිය සඳහා ප්රදේශයේ වතු කම්කරු ජනතාව ඇතුළු වැඩකරන ජනතාව දහස් ගණනින් එක්ව සිටියහ. නුවරඑළිය දිස්ත්රික් මහරෝහල අසලින් ආරම්භ වූ මැයි දින පෙළපාලිය නගරය පුරා ගමන් කළ අතර, ඊට ආගමික නායකයන් මෙන්ම දේශපාලන නියෝජිතයන් විශාල පිරිසක් ද සිය සහයෝගය පළ කරමින් සහභාගී වූහ.කම්කරු අයිතීන් වෙනුවෙන් හඬ නගන අතරම, රටේ පොදු දේපළ කොල්ලකෑ පිරිස්වලට එරෙහිව නීතිය ක්රියාත්මක කිරීමේ රජයේ ස්ථාවරය ජනාධිපතිවරයා මෙහිදී යළිත් සිහිපත් කළේය. දූෂණයෙන් තොර පාලනයක් ස්ථාපිත කිරීමේ ගමනේදී 2026 වසරේදී වංචනිකයන්ට හිමිවිය යුතු දඬුවම් නියත වශයෙන්ම ලැබෙනු ඇති බවත්, එමගින් ජනතාව අපේක්ෂා කරන යුක්තිය ඉටු කරන බවත් ජනාධිපති අනුර කුමාර දිසානායක මහතා සිය කතාවේදී වැඩිදුරටත් අවධාරණය කළේය.
2026 හොරුන්ට සහ වංචනිකයන්ට සිරගෙවල් නියම වන වසරයි – ජනපතිගෙන් දැඩි ප්රකාශයක්
