සේවක අර්ථසාධක අරමුදල (EPF) සහ සේවක භාරකාර අරමුදල (ETF) යන ආයතන දෙක ඒකාබද්ධ කර පොදු පාලන රාමුවක් යටතට ගෙන ඒමේ හැකියාව අධ්යයනය කිරීමට ජ්යෙෂ්ඨ නිලධාරීන්ගෙන් සමන්විත විශේෂ කමිටුවක් පත් කිරීමට අමාත්ය මණ්ඩල අනුමැතිය ලැබී ඇත. කම්කරු අමාත්යවරයාගේ යෝජනාවකට අනුව ක්රියාත්මක වන මෙම වැඩපිළිවෙළේ මූලික අරමුණ වන්නේ, රජය, සේවායෝජකයන් සහ සේවකයන් යන පාර්ශ්ව තුනම නියෝජනය වන පරිදි එක් ත්රිපාර්ශ්වික (Tripartite) කළමනාකරණ ව්යුහයක් තුළ මෙම අරමුදල් පවත්වාගෙන යාමේ ශක්යතාව සොයා බැලීමයි.1958 දී ආරම්භ කළ EPF අරමුදලේ සාමාජිකයන් මිලියන 2.5කට අධික සංඛ්යාවක් සිටින අතර එහි වත්කම් වටිනාකම රුපියල් ට්රිලියන 4.9 ඉක්මවයි. මෙහි කටයුතු ශ්රී ලංකා මහ බැංකුව සහ කම්කරු දෙපාර්තමේන්තුව විසින් බෙදා වෙන්ව සිදු කෙරේ. අනෙක් අතට, 1980 දී පිහිටුවූ ETF අරමුදල සාමාජිකයන් මිලියන 3කට අධික ප්රමාණයකගේ දායකත්වයෙන් රුපියල් බිලියන 637.5ක වත්කම් කළමනාකරණය කරන අතර, එය දැනටමත් ත්රිපාර්ශ්වික මණ්ඩලයක් මගින් පාලනය වන්නකි.ජාත්යන්තර කම්කරු සංවිධානයේ (ILO) නිර්දේශ මත පදනම් වූ මෙම ත්රිපාර්ශ්වික පාලන ආකෘතිය ජාත්යන්තරව සාර්ථක ක්රමවේදයක් ලෙස පිළිගැනේ. මෙම ඒකාබද්ධ කිරීමේ පියවර හරහා අනාගතයේදී අරමුදල් දෙකේම පරිපාලන කාර්යක්ෂමතාව ඉහළ නැංවීමට සහ කළමනාකරණ කටයුතු වඩාත් විධිමත් කිරීමට රජය බලාපොරොත්තු වේ.
EPF සහ ETF ඒකාබද්ධ කිරීමේ හැකියාව සොයා බැලීමට කමිටුවක් පත් කෙරේ
