කාලීන අවශ්යතාවලට පමණක් සීමා නොවී, රටට දිගුකාලීන සහ ස්ථාවර ජාතික පාරිසරික ප්රතිපත්තියක් සැකසීමේ වැදගත්කම විපක්ෂ නායක සජිත් ප්රේමදාස මහතා අවධාරණය කරයි. වත්මන් රජයේ පරිසර කළමනාකරණ ක්රමවේද තාවකාලික විසඳුම් මාත්රාවක් පමණක් බව පෙන්වා දෙන ඒ මහතා, මෙම අදහස් පළ කළේ කොළඹ නිදහස් චතුරස්ර පරිශ්රයේ පැවැති පරිසර දැනුවත් කිරීමේ වැඩසටහනකට එක්වෙමිනි. එහිදී ඔහු කියා සිටියේ ස්වභාවික විපත් සිදු වූ පසු පිළියම් සෙවීමට වඩා, ඒවා කල්තියා හඳුනාගෙන සූදානම් වීමේ ක්රමවේදයක් රට තුළ ස්ථාපිත විය යුතු බවයි.ගෝලීය දේශගුණික විපර්යාසයන්හි බලපෑම පිළිබඳව අදහස් දක්වමින්, එල්-නීනෝ (El Niño) සහ ලා-නීනා (La Niña) වැනි කාලගුණික රටාවන් හේතුවෙන් දේශීය කෘෂිකර්මාන්තයට, ජන ජීවිතයට මෙන්ම ජල විදුලි උත්පාදනයට එල්ල විය හැකි බරපතළ තර්ජන පිළිබඳව ද විපක්ෂ නායකවරයා මෙහිදී කරුණු පැහැදිලි කළේය. මෙවැනි පාරිසරික අර්බුද හමුවේ ජාතික ආර්ථිකය මෙන්ම ජනතාවගේ දෛනික ජීවනෝපායන් දැඩි අවදානමකට ලක්වන බැවින්, ඒ සඳහා පූර්ව සූදානමක ඇති අත්යවශ්යතාවය ඔහු දීර්ඝව විස්තර කළේය.රටක සංවර්ධනය මැනීමේදී හුදෙක් දළ දේශීය නිෂ්පාදිතය (GDP) වැනි මූල්යමය සාධක ගැන පමණක් අවධානය යොමු නොකර, ‘ජාතික සතුටේ දර්ශකය’ (Gross National Happiness) වැනි පුළුල් සංකල්ප කරා ශ්රී ලංකාව ගමන් කළ යුතු බව ද ඔහු යෝජනා කරයි. අනාගතය වෙනුවෙන් පුළුල් දැක්මක් ඇති කරගත යුතු බව පවසන ඒ මහතා, එහිදී පරිසර පද්ධති, වනාන්තර මෙන්ම සතා සිව්පාවා සතු වටිනාකම ජාතික මට්ටමෙන් ඉහළින්ම අගය කළ යුතු බව ද වැඩිදුරටත් ප්රකාශ කර සිටියේය.
ශ්රී ලංකාවට ස්ථාවර ජාතික පාරිසරික ප්රතිපත්තියක අවශ්යතාවය විපක්ෂ නායකවරයා පෙන්වා දෙයි
