දිවයින පුරා ග්රාම නිලධාරී වසම් 1000ක් ආවරණය කරමින් ප්රජා සාමාජිකයින් 20,000ක් පමණ ආපදා කළමනාකරණය සම්බන්ධයෙන් දැනුවත් කිරීමේ විශේෂ පුහුණු වැඩසටහනක් මහනුවරදී ආරම්භ කර තිබේ. “C3R” ලෙස නම් කර ඇති මෙම පුහුණු වැඩසටහන සෞඛ්ය නියෝජ්ය අමාත්ය වෛද්ය හංසක විජේමුණි සහ මධ්යම පළාත් ආණ්ඩුකාර වෛද්ය හර්ෂ සුරංග යන මහත්වරුන්ගේ ප්රධානත්වයෙන් මහනුවර හෝටලයකදී නිල වශයෙන් ආරම්භ විය.ස්වභාවික හා වෙනත් හදිසි ආපදා තත්ත්වයන් කල්තියා හඳුනාගැනීම, එවැනි අවස්ථාවල ක්රියා කළ යුතු ආකාරය පිළිබඳ දැනුම ලබාදීම සහ අත්යාවශ්ය සම්පත් මනා ලෙස භාවිත කරමින් ප්රජාව සවිබලගැන්වීම මෙම ව්යාපෘතියේ මූලික අරමුණයි. සෞඛ්ය, ජනමාධ්ය, අධිකරණ සහ ආපදා කළමනාකරණ අමාත්යාංශ ඒකාබද්ධව ක්රියාත්මක කරන මෙම වැඩසටහන සඳහා යුනිසෙෆ් සංවිධානයේ සහ ලෝක බැංකුවේ වසංගත අරමුදලේ සහයෝගය හිමිව ඇත.මෙහි පළමු අදියර යටතේ දිස්ත්රික්ක 10ක් නියෝජනය වන පරිදි තෝරාගත් නිලධාරීන් පිරිසක් පුහුණු කෙරෙන අතර, ඉදිරියේදී මෙම වැඩසටහන මුළු රටම ආවරණය වන පරිදි පුළුල් කිරීමට නියමිතය. එක් එක් ප්රදේශයට ආවේණික වන ආපදා අවදානම් නිවැරදිව හඳුනාගෙන ඒවාට මුහුණදීමට අවශ්ය ප්රජා නායකයින් සහ සවිබල ගැන්වීම් මේ හරහා සිදු කෙරේ.මෙම සමාරම්භක අවස්ථාවට එක්වෙමින් නියෝජ්ය අමාත්යවරයා පෙන්වා දුන්නේ දේශගුණික විපර්යාස හේතුවෙන් අවදානමට ලක්විය හැකි ප්රධාන රටවල් අතරට ශ්රී ලංකාවද ඇතුළත් වන බවයි. එබැවින් ආපදා තත්ත්වයන් හමුවේ සන්නිවේදන බිඳවැටීම් ඇතුළු දුර්වලතා මඟහරවා ගනිමින් පූර්ව සූදානමකින් යුතුව කටයුතු කිරීමේ වැදගත්කම ඔහු විශේෂයෙන් අවධාරණය කළේය.සැලසුම් සහගත සංවර්ධන ක්රියාවලීන් සහ නිසි කළමනාකරණය හරහා අනාගතයේදී සිදුවිය හැකි ජීවිත හා දේපළ හානි අවම කර ගැනීම මෙහි අරමුණ වී තිබේ. වැඩසටහන ක්රියාත්මක කිරීමෙන් අනතුරුව එහි ප්රගතිය පිළිබඳ අඛණ්ඩ පසුවිපරම් ක්රමවේදයක් ක්රියාත්මක වන අතර, විශිෂ්ට දස්කම් දක්වන ග්රාම නිලධාරී වසම් ඇගයීමට ලක්කිරීමටද අදාළ අංශ කටයුතු යොදා ඇත.අනාගතයේ මතුවිය හැකි හදිසි වසංගත හෝ ආපදා හමුවේ නොසැලී සාමූහිකව මුහුණ දිය හැකි ශක්තිමත් ප්රජාවක් නිර්මාණය කිරීම මෙම පුහුණු මාලාවේ ප්රධාන අපේක්ෂාවයි. අදාළ අමාත්යාංශ නියෝජනය කරමින් උසස් නිලධාරීන් රැසක් සහභාගී වූ මෙම වැඩසටහන ඉදිරියේදී දිවයිනේ සෙසු ප්රදේශ වෙතද ක්රමානුකූලව විහිදුවීමට නියමිතය.
ආපදා තත්ත්වයන්ට මුහුණදීමට ග්රාම නිලධාරී වසම් 1000ක ප්රජාව පුහුණු කිරීමේ වැඩසටහනක්
