පාර්ලිමේන්තු මන්ත්‍රී නාමල් රාජපක්ෂ ඇතුළු සැකකරුවන්ට එරෙහිව ගොනු කර ඇති මුදල් විශුද්ධීකරණ නඩුව ලබන පෙබරවාරි මස 11 වන දින යළි කැඳවන ලෙස කොළඹ ප්‍රධාන මහෙස්ත්‍රාත් අසංග එස් බෝදරගම මහතා නියෝග කර තිබේ. පෞද්ගලික සමාගමක රුපියල් මිලියන 15ක මුදලක් අයථා ලෙස ආයෝජනය කිරීම මඟින් මුදල් විශුද්ධිකරණය වැළැක්වීමේ පනත යටතේ වරදක් සිදු කළ බවට චෝදනා කරමින් මෙම විමර්ශන ක්‍රියාත්මක වේ.මෙම නඩුව ඊයේ (29) අධිකරණයේදී කැඳවූ අවස්ථාවේදී, දැනට රක්ෂිත බන්ධනාගාරගතව සිටින නාමල් රාජපක්ෂ මහතා අධිකරණයට ඉදිරිපත් කර නොතිබිණි. එහෙත්, ඇප මත මුදා හැර සිටින සෙසු සැකකරුවන් වන සුජානි බෝගොල්ලාගම, නිත්‍ය සමරනායක සහ සුදර්ශන බණ්ඩාර යන මහත්ම මහත්මීන් අධිකරණය හමුවේ පෙනී සිටියහ.එදිනට නඩුව කැඳවන අවස්ථාවේදී නීතිපති උපදෙස්වල ප්‍රගතිය අධිකරණයට වාර්තා කරන ලෙසද මහෙස්ත්‍රාත්වරයා අදාළ පාර්ශ්ව වෙත වැඩිදුරටත් නියෝග කළේය. මෙම නඩු කටයුත්තට අදාළ ඉදිරි විමර්ශන අංශ විසින් අඛණ්ඩව සිදු කරමින් පවතී.
නාමල් රාජපක්ෂගේ මුදල් විශුද්ධීකරණ නඩුව පෙබරවාරි 11ට කල් තැබේ
