මෙම වසරේ ජනවාරි පළමුවැනිදා සිට ජුනි 05 වැනිදා දක්වා කාලය තුළ මෙරටින් ඩෙංගු රෝගීන් 38,095 දෙනෙකු වාර්තා වී ඇති බව ජාතික ඩෙංගු මර්දන ඒකකය පවසයි. පවතින වැසි සහිත කාලගුණය හේතුවෙන් ඉදිරියේදී රෝගීන්ගේ වර්ධනයක් සිදුවිය හැකි බව පෙන්වා දෙන වෛද්ය කපිල කන්නන්ගර මහතා, කොළඹ, ගම්පහ, මහනුවර සහ ගාල්ල ඇතුළු දිස්ත්රික්ක 12ක් මේ වන විට අධි අවදානම් කලාප ලෙස හඳුනාගෙන ඇති බව සඳහන් කරයි. මෙම තත්ත්වය පාලනය කිරීම සඳහා සෞඛ්ය අංශ, පොලීසිය, ත්රිවිධ හමුදාව සහ ස්වෙච්ඡා සංවිධාන ඒකාබද්ධව ජුනි 08, 09 සහ 10 යන දිනවලදී සෞඛ්ය වෛද්ය නිලධාරී කොට්ඨාස 74ක් කේන්ද්ර කරගනිමින් විශේෂ මදුරු මර්දන වැඩසටහනක් දියත් කිරීමට සැලසුම් කර ඇත.පැහැදිලි ජලය රැඳෙන ඕනෑම ස්ථානයක ඩෙංගු මදුරුවන් බෝවිය හැකි බැවින්, සතියකට වරක් විනාඩි 30ක් වත් වැය කර තමන් අවට පරිසරය පිරිසිදු කිරීමට පියවර ගන්නා ලෙස සෞඛ්ය අංශ මහජනතාවගෙන් ඉල්ලා සිටියි. එමෙන්ම, මදුරුවන් බහුලව ගැවසෙන උදේ සහ සවස් කාලවලදී ශරීරය හොඳින් ආවරණය වන පරිදි ඇඳුම් ඇඳීම හෝ අනුමත මදුරු විකර්ශක භාවිත කිරීම මඟින් මදුරු දෂ්ටනයෙන් ආරක්ෂා විය හැක.තද උණ, හිසරදය, වමනය, මස්පිඩු හා සන්ධි වේදනාව මෙන්ම සමේ රතු ලප මතු වීම වැනි ඩෙංගු රෝග ලක්ෂණ ඇත්නම් ප්රමාද නොවී වෛද්ය උපදෙස් ලබාගත යුතුය. එහිදී උණ පාලනය සඳහා පැරසිටමෝල් ඖෂධය පමණක් භාවිත කළ යුතු අතර, ශරීර අභ්යන්තර රුධිර වහනය වැනි බරපතළ සංකූලතා ඇති කළ හැකි ඇස්ප්රීන්, ඉබියුප්රොෆන්, ඩයික්ලොෆෙනැක් වැනි (NSAID) සහ ස්ටෙරොයිඩ් කාණ්ඩයේ ඖෂධ භාවිත කිරීමෙන් සම්පූර්ණයෙන්ම වැළකිය යුතු බව සෞඛ්ය අංශ දැඩිව අවධාරණය කරයි.
මෙරට ඩෙංගු රෝගීන් 38,000 පනී: දිස්ත්රික්ක 12කට විශේෂ මදුරු මර්දන වැඩසටහනක්
