ගෝලීය වෙළඳාම තුළ මානව හිමිකම් මෙන්ම ශ්රම සුරක්ෂිතතාව තහවුරු කිරීම සහ බලහත්කාර ශ්රමය යොදාගනිමින් නිපදවන භාණ්ඩ පාලනය කිරීමේ අරමුණින් ඇමරිකානු වෙළඳ නියෝජිත කාර්යාලය විසින් නව තීරුබදු යෝජනාවක් ඉදිරිපත් කර තිබේ. ශ්රී ලංකාව ඇතුළු රටවල් 60ක් ඉලක්ක කරගනිමින් හඳුන්වා දී ඇති මෙම නව බදු රාමුව, ජාත්යන්තර වෙළඳ තරගකාරිත්වයට සහ ඇතැම් රටවල ආර්ථික ස්ථාවරත්වයට සෘජු බලපෑමක් එල්ල කරනු ඇතැයි ආර්ථික විචාරකයෝ පෙන්වා දෙති. විශේෂයෙන්ම ඇමරිකාව වෙත භාණ්ඩ අපනයනය කරන ශ්රී ලංකාව වැනි රටවලට මෙමඟින් ඉදිරියේදී දැඩි බලපෑමක් එල්ල වීමේ අවදානමක් මතුව ඇත.මෙම නව යෝජනාව යටතේ ඇමරිකාව විසින් රටවල් වර්ගීකරණය කර ඇත්තේ බදු අනුපාත කාණ්ඩ දෙකක් යටතේය. එහිදී ශ්රී ලංකාව, චීනය, ඉන්දියාව, ජපානය සහ දකුණු කොරියාව ඇතුළු රටවල් 46ක් සඳහා 12.5%ක ඉහළ තීරුබදු අනුපාතයක් යෝජනා වී තිබේ. අනෙක් අතට, කැනඩාව, යුරෝපා සංගමය මෙන්ම මෙරට ඇඟලුම් ක්ෂේත්රයේ ප්රධාන තරගකරුවන් වන බංග්ලාදේශය, කාම්බෝජය සහ මැලේසියාව වැනි රටවල් සඳහා යෝජනා වී ඇත්තේ 10%ක අඩු බදු ප්රතිශතයකි. ප්රධාන තරගකාරී රටවල් අපට වඩා අඩු බදු කාණ්ඩයකට ඇතුළත් වීම හේතුවෙන් ඉදිරියේදී දේශීය අපනයනකරුවන්ට දරාගත නොහැකි වෙළඳ පීඩනයකට මුහුණ දීමට සිදුවනු ඇතැයි විශ්ලේෂකයෝ අනතුරු අඟවති.මෙම තීරුබදු සංශෝධන ක්රියාත්මක වීමත් සමඟ මෙරට ආර්ථිකයේ ප්රධානතම ජීවනාලියක් බඳු වූ ඇඟලුම් අපනයන ක්ෂේත්රය දැඩි අර්බුදයකට ලක්වීමේ ලකුණු පහළ වී තිබේ. ඇමරිකානු වෙළඳපොළ තුළ පවතින ශ්රී ලංකා වෙළඳ පංගුව ආරක්ෂා කර ගැනීම වෙනුවෙන් රාජ්ය තාන්ත්රික මට්ටමින් මෙන්ම උපායමාර්ගිකව කටයුතු කිරීමේ අවශ්යතාව මේ වන විට මතුව ඇත. එබැවින් ජාත්යන්තර ශ්රම ප්රමිතීන්ට අනුකූල වෙමින්, ගෝලීය වෙළඳපොළ තුළ සිදුවන මෙවැනි වෙනස්කම් හමුවේ දේශීය අපනයන ක්ෂේත්රයේ තරගකාරිත්වය රැක ගැනීමට ශ්රී ලංකාව කඩිනමින් සූදානම් විය යුතුය.
රටවල් 60ක භාණ්ඩ සඳහා ඇමරිකාවෙන් නව තීරුබදු යෝජනාවක්
