ලොවට සාමය බෙදන ‘එහිපස්සිකෝ’ පාගමන ඇරඹෙයි: ‘ආලෝක’ සුනඛයාත් සමඟ වියට්නාම හිමිවරු මෙරටට

ගෝලීය සාමය සහ සහජීවනය පෙරදැරි කරගත් “එහිපස්සිකෝ” (Ehipassiko) අන්තර්ජාතික සාම පාගමනට එක්වීම සඳහා අමෙරිකාවේ පදිංචි වියට්නාම ජාතික භික්ෂූන් වහන්සේලා පිරිසක් අද (21) අලුයම දිවයිනට වැඩම කළහ. පූජ්‍ය පඤ්ඤාකර සහ රතනගුණ යන හිමිවරුන් ඇතුළු මෙම දූත පිරිස කටුනායක ගුවන් තොටුපළේදී රජයේ ඉහළ නිලධාරීන් විසින් උණුසුම් අයුරින් පිළිගනු ලැබූහ. මෙම සංචාරයේ විශේෂත්වය වූයේ “ආලෝක” (Aloka) නම් සුනඛයා ද ගුවන් යානය තුළ මගී අසුනක අසුන්ගෙන භික්ෂූන් වහන්සේලා සමඟ මෙරටට පැමිණීමයි.​දිවයිනට ළඟා වූ “ආලෝක” සුනඛයා වහාම සත්ව නිරෝධායන නිලධාරීන්ගේ පරීක්ෂාවට ලක් වූ අතර, එහිදී සියලු සෞඛ්‍ය වාර්තා සහ රුධිර පරීක්ෂණ සාර්ථකව අවසන් කෙරිණි. මෙරට පශු වෛද්‍යවරුන්ගේ කාරුණික මැදිහත්වීම හමුවේ ඉතා සන්සුන්ව පරීක්ෂණවලට මුහුණ දුන් ආලෝක, අනතුරුව භික්ෂූන් වහන්සේලා සමඟ අනුරාධපුරය බලා පිටත්ව ගියේය. ජාත්‍යන්තර අවධානය දිනාගත් මෙම පාගමන බුද්ධ ශාසන අමාත්‍යාංශය ඇතුළු රාජ්‍ය ආයතන රැසක පූර්ණ අනුග්‍රහය යටතේ අද පස්වරුවේ ආරම්භ වීමට නියමිතය.​මෙම ආධ්‍යාත්මික චාරිකාව අද පස්වරු 3.00 ට අනුරාධපුර ජය ශ්‍රී මහ බෝධීන් වහන්සේගේ රෝපිත අංකුරයක් භික්ෂූන් වහන්සේලා වෙත භාරදීමෙන් ආරම්භ වන අතර, පස්වරු 4.00 ට රුවන්වැලි සෑ රදුන් අභියස විශේෂ ආගමික වතාවත් පැවැත්වේ. හෙට (22) පෙරවරුවේ මාතලේ අලුවිහාරයෙන් ආරම්භ වන පාගමන අප්‍රේල් 23 වනදා මහනුවර ශ්‍රී දළදා මාලිගාව වෙත ළඟා වීමට නියමිතය. එහිදී මල්වතු සහ අස්ගිරි මහා නාහිමිවරුන් බැහැදැක ආශිර්වාද ලබා ගැනීමට ද කටයුතු යොදා ඇත.​අප්‍රේල් 24 වනදා සිට පිළිවෙළින් මාවනැල්ල, තොලංගමුව සහ යක්කල හරහා ගමන් ගන්නා මෙම සාම චාරිකාව අප්‍රේල් 27 වනදා කැලණිය රාජමහා විහාරයට ළඟා වීමට සැලසුම් කර තිබේ. මෙම ගමන අතරතුර ශ්‍රී ලංකාවේ බෞද්ධ උරුමය, සාම්ප්‍රදායික කලා සහ දේශීය කර්මාන්ත පිළිබඳව ජාත්‍යන්තර ප්‍රජාව දැනුවත් කිරීම ද තවත් එක් ප්‍රධාන අරමුණකි. පාගමනට සමගාමීව විවිධ ප්‍රදේශවල ආගමික වැඩසටහන් රැසක් ද සංවිධානය කර ඇත.​මෙම වැඩසටහනේ විශේෂතම අවස්ථාව අප්‍රේල් 28 වනදා කොළඹ නිදහස් චතුරස්‍රයේදී ජනාධිපතිවරයාගේ සහභාගීත්වයෙන් පැවැත්වෙන රාජ්‍ය උත්සවයයි. එදින පෙරවරුවේ පාසල් සහ විශ්වවිද්‍යාල සිසුන් සමඟ විශේෂ සංවාදයක් පැවැත්වෙන අතර, පස්වරුවේ නිදහස් චතුරස්‍රයේ සිට ගංගාරාම විහාරස්ථානය දක්වා ගමන් කර “We are the Design” නමින් විශේෂ වැඩසටහනකට ද දූත පිරිස එක් වනු ඇත.​අවිහිංසාවේ පණිවිඩය ලොව පුරා ප්‍රචලිත කිරීම වෙනුවෙන් කැපවන මෙම වියට්නාම භික්ෂූන් වහන්සේලා මැයි මස 01 වනදා සිය සාම චාරිකාව නිමා කරමින් නැවත අමෙරිකාව බලා පිටත්ව යාමට නියමිතය. යුද ගැටුම්වලින් පීඩිත ලෝකයට සාමයේ සහ සහෝදරත්වයේ අගය කියා දීම මෙම සම්පූර්ණ වැඩසටහනේ මූලික පණිවිඩය බව සංවිධායක මණ්ඩලය වැඩිදුරටත් සඳහන් කරයි.