බ්රිතාන්ය පාලන සමයේ එනම් 1866 වසරේදී ව්යවස්ථාපිතව පිහිටුවන ලද ශ්රී ලංකා පොලිසිය, සිය 160 වැනි සංවත්සරය සැප්තැම්බර් මස 3 වැනි දිනට යෙදී ඇති ඓතිහාසික දිනය අභිමානවත් අයුරින් සැමරීමට සූදානම් වේ. රටේ නීතිය හා සාමය රැකීමේ ප්රධාන බලවේගයක් වන මෙම ආයතනය, වත්මන් සමාජ අභියෝග හමුවේ තම කාර්යක්ෂමතාව, ආයතනික ප්රතිරූපය සහ මහජන සම්බන්ධතා වැඩිදියුණු කර ගැනීමේ අරමුණින් පුළුල් වැඩසටහන් මාලාවක් ක්රියාත්මක කරයි.පොලිස්පතිවරයාගේ මඟ පෙන්වීම යටතේ ක්රියාත්මක වන මෙම සැමරුම් මාලාව හුදෙක් උත්සවයකට පමණක් සීමා නොවී, පොලිසිය සහ මහජනතාව අතර පවතින දුරස්ථභාවය අවම කරමින් ප්රජා කේන්ද්රීය සේවාවක් වර්ධනය කිරීම අරමුණු කරගත් සමාජීය මෙහෙයුමක් ලෙස පෙරමුණට පැමිණ ඇත. ඒ යටතේ, ඉදිරි දිනවලදී මුද්රිත හා විද්යුත් මාධ්ය හරහා නීතිමය දැනුම ලබා දීම සහ මහජන සේවාවන් පිළිබඳව පුරවැසියන් දැනුවත් කිරීමේ ජාතික මට්ටමේ ව්යාපෘති රැසක් දිවයින පුරා ක්රියාත්මක කෙරේ.මෙම සංවත්සරයට සමගාමීව එළඹෙන සැප්තැම්බර් මස 4, 5 සහ 6 යන දිනවල පොලිස් ක්ෂේත්ර බලකා මූලස්ථානය කේන්ද්ර කරගනිමින් මහජන ප්රදර්ශනයක් සහ සංස්කෘතික සංදර්ශන මාලාවක් පැවැත්වීමට නියමිතය. මෙමඟින් නීතියේ ආධිපත්යය සුරැකීමට කැපවන ආයතනයක් ලෙස පොලිසියේ ක්රියාකාරීත්වය තවදුරටත් ශක්තිමත් වනවා පමණක් නොව, ඉදිරි පරපුර සමඟ වඩාත් හිතකාමී සහ විනිවිදභාවයකින් යුත් ආයතනික සංස්කෘතියක් ගොඩනැඟීමටද අවශ්ය පදනම වැටෙනු ඇත.
ශ්රී ලංකා පොලිසියේ 160 වැනි සංවත්සරය සැප්තැම්බර් 4, 5 සහ 6 දිනවලදී
