ශ්රී ලංකා වරලත් ගණකාධිකාරීවරුන්ගේ ආයතනය (CA Sri Lanka) සහ ශ්රී ලංකා නීතිඥ සංගමය (BASL) අතර වෘත්තීය සහයෝගීතාව තහවුරු කරමින් විශේෂ අවබෝධතා ගිවිසුමක් අත්සන් කර ඇත. කොළඹ පිහිටි නීතිඥ සංගම් මූලස්ථානයේදී පැවති මෙම උත්සවයේදී, CA ශ්රී ලංකා සභාපති තිෂාන් සුබසිංහ සහ ශ්රී ලංකා නීතිඥ සංගමයේ සභාපති රජීව් අමරසූරිය යන මහත්වරුන් විසින් මෙම ඓතිහාසික ගිවිසුම සඳහා අත්සන් තබන ලදී. ගණකාධිකාරී සහ නීති වෘත්තීන් දෙකක් මෙලෙස නිල වශයෙන් හවුල්කාරීත්වයකට එළඹුණු පළමු අවස්ථාව මෙය වීම විශේෂත්වයකි.වර්තමාන ව්යාපාරික ක්ෂේත්රය තුළ මූල්ය, නීතිමය සහ නියාමන අංශ එකිනෙක මත දැඩි ලෙස රඳා පැවතීම මෙම පියවරට මුල් වී ඇත. ඒ අනුව, මෙම ගිවිසුම මඟින් දෙපාර්ශ්වයේම සාමාජිකයින් අතර වෘත්තීය දැනුම හුවමාරු කර ගැනීම, ඒකාබද්ධ වෘත්තීය සංවර්ධන වැඩසටහන් (CPD) ක්රියාත්මක කිරීම සහ ධාරිතා වර්ධන සැසි සංවිධානය කිරීමට නියමිතය.මෙමඟින් මෙරට ආයතනික යහපාලනය ඉහළ නංවාලීමටත්, ශ්රී ලංකාවේ සමස්ත ආර්ථික සංවර්ධනයට ශක්තිමත් පිටුවහලක් ලබා දීමටත් හැකි වන බව CA ශ්රී ලංකා සභාපතිවරයා පෙන්වා දුන්නේය. තවද, එවැනි හවුල්කාරීත්වයන් තුළින් උසස් වෘත්තීය ප්රමිතීන් සහ දෙපාර්ශ්වයේම අන්යෝන්ය වර්ධනය තහවුරු වන බව නීතිඥ සංගමයේ සභාපතිවරයා ද මෙහිදී වැඩිදුරටත් අවධාරණය කළේය.
ශ්රී ලංකා වරලත් ගණකාධිකාරීවරුන්ගේ ආයතනය (CA Sri Lanka) සහ ශ්රී ලංකා නීතිඥ සංගමය (BASL) අතර අවබෝධතා ගිවිසුමකට අත්සන් කෙරේ
