තම වෘත්තීය ගැටලු සඳහා බලධාරීන්ගෙන් නිසි විසඳුම් නොලැබීම හේතුවෙන්, අද (15) දින සිට නැවත දැනුම්දෙන තුරු සෙනසුරාදා දින රාජකාරිවලින් ඉවත් වීමට ශ්රී ලංකා ග්රාම නිලධාරීන්ගේ සංගමය තීරණය කර ඇත. ගමන් වියදම් දීමනාව වැඩි කිරීම, උපාධිය සේවයට මූලික සුදුසුකම බවට පත් කිරීම සහ කැබිනට් අනුමත දීමනා ලබා ගැනීම ඇතුළු ප්රධාන ඉල්ලීම් කිහිපයක් මුල් කරගනිමින් මීට පෙර අසනීප නිවාඩු වාර්තා කළද, රජයෙන් ඊට සාධනීය ප්රතිචාරයක් ලැබී නැත.මෙම වෘත්තීය සමිති ක්රියාමාර්ගයත් සමඟ ග්රාම නිලධාරීන් ඉදිරියේදී සතියේ අඟහරුවාදා සහ බ්රහස්පතින්දා දිනවල පමණක් වසම් කාර්යාලවල සේවය සඳහා රැඳී සිටිනු ඇති අතර, අමතර දීමනාවකින් තොරව නිවාඩු කැප කරමින් කරනු ලැබූ සෙනසුරාදා කාර්යාල දිනය සම්පූර්ණයෙන්ම වර්ජනය කර තිබේ. මේ නිසා මහජනතාවට අවශ්ය විවිධ සහතිකපත් ලබාගැනීම සහ රාජ්ය සේවා කටයුතු පවත්වාගෙන යාම දැඩි ලෙස අඩාල වී ඇති අතර, ග්රාමීය පරිපාලන ක්රියාවලිය ද මන්දගාමී වී ඇත.ගැටලුවට කඩිනම් පිළියම් ලබා නොදුනහොත් ඉදිරියේදී වෘත්තීය සමිති ක්රියාමාර්ග තවදුරටත් දැඩි කරන බව සංගමයේ නියෝජිතයෝ අවධාරණය කරති. රටේ පරිපාලන ජාලයේ ප්රධාන පුරුකක් වන ග්රාම නිලධාරී සේවය මෙලෙස සෙනසුරාදා සේවයෙන් ඉවත් වීමත් සමඟ රාජ්ය පාර්ශ්වයට එල්ල වී ඇති පීඩනය ඉහළ ගොස් ඇති අතර, ඉදිරි දිනවල ලැබෙන ප්රතිචාර මත මෙම අරගලයේ ඉදිරි පියවර තීරණය වනු ඇත.
ග්රාම නිලධාරීන් සෙනසුරාදා දින රාජකාරිවලින් ඉවත් වෙයි
