එල්-නිනෝ (El Niño) ගෝලීය දේශගුණික විපර්යාසයේ බලපෑම හේතුවෙන් ඉදිරි ජූලි සහ අගෝස්තු මාසවලදී දිවයින පුරා වර්ෂාපතනය සැලකිය යුතු ලෙස අඩුවී, දැඩි වියළි කාලගුණික තත්ත්වයක් ඇතිවිය හැකි බව කාලගුණ විද්යා දෙපාර්තමේන්තුව අනතුරු අඟවයි. වත්මන් දේශගුණික දත්තවලට අනුව මෙම තත්ත්වය රටේ කෘෂිකර්මාන්තයට, ජල සම්පාදනයට මෙන්ම විදුලි බල උත්පාදනයට සෘජුවම බලපෑම් එල්ල කළ හැකිය. එබැවින් සිදුවිය හැකි අහිතකර බලපෑම් අවම කරගැනීම සඳහා අදාළ අංශ කල්තියා සූදානම් වීමේ අවශ්යතාව බලධාරීන් පෙන්වා දෙයි.කාලගුණ විද්යා දෙපාර්තමේන්තුවේ අතිරේක අධ්යක්ෂ ජනරාල් අජිත් විජේමාන්න මහතා සඳහන් කරන්නේ, මෙම දේශගුණික සංසිද්ධිය එළඹෙන ඔක්තෝබර් සහ නොවැම්බර් මාස වන විට තවදුරටත් උග්ර විය හැකි බවයි. සාමාන්යයෙන් මාස 9 සිට 12 දක්වා කාලයක් සක්රියව පවතින එල්-නිනෝ තත්ත්වයක බලපෑම වසරකටත් වඩා වැඩි කාලයක් මෙරට කාලගුණය කෙරෙහි බලපෑම් එල්ල කිරීමට ඉඩ ඇත. මේ හේතුවෙන් ඉදිරි වගා කන්නයන්හි අස්වැන්න ආරක්ෂා කරගැනීම සහ ජල කළමනාකරණය වෙනුවෙන් ආපදා අවම කිරීමේ විශේෂ උපදෙස් මාලාවක් අදාළ ආයතන වෙත මේ වන විටත් නිකුත් කර තිබේ.වියළි දේශගුණය හමුවේ රටේ ආහාර සුරක්ෂිතතාව සහ විදුලි සැපයුම බිඳවැටීමකින් තොරව පවත්වාගෙන යාම සඳහා රජය මැදිහත් වෙමින් විශේෂ සැලසුම් සකස් කර ඇත. ජල අපතේ යෑම වැළැක්වීම සහ කෘෂිකාර්මික කටයුතු ක්රමවත්ව කළමනාකරණය කිරීම මගින් මෙම ස්වාභාවික අභියෝගයට සාර්ථකව මුහුණ දිය හැකි බව රජයේ විශ්වාසයයි. ඉදිරි සති කිහිපය තුළ කාලගුණ විද්යා දෙපාර්තමේන්තුව විසින් වරින් වර නිකුත් කරනු ලබන නිල නිවේදන කෙරෙහි අවධානයෙන් සිටින ලෙස මහජනතාවගෙන් ඉල්ලා සිටියි.
ජූලි සහ අගෝස්තු මාසවලදී දිවයිනට දැඩි වියළි කාලගුණයක්
