වර්තමාන සමාජය තුළ දරුවන් මුහුණ දෙන විවිධ ශාරීරික හා මානසික අවදානම් සැලකිල්ලට ගනිමින්, ඔවුන්ගේ ආරක්ෂාව සහතික කිරීම සඳහා ශ්රී ලංකා පොලිසිය විසින් දෙමාපියන් වෙත විශේෂ දැනුම්දීමක් සිදු කර තිබේ. දරුවන් එදිනෙදා ඇසුරු කරන්නේ කවුරුන් සමඟද යන්න පිළිබඳව නිරන්තරයෙන් විමසිලිමත් වන ලෙස පොලිසිය අවධාරණය කරයි. විශේෂයෙන්ම මත්ද්රව්යවලට ඇබ්බැහි වීම, ලිංගික අතවර සහ සමාජ මාධ්ය ඇතුළු අන්තර්ජාලය ඔස්සේ ආගන්තුක පුද්ගලයන්ගේ ගොදුරු බවට පත්වීම වැනි බරපතළ තර්ජන රැසක් පවතින බැවින්, වැඩිහිටියන් මේ පිළිබඳව දැඩි අවධානයකින් පසුවිය යුතු බව පෙන්වා දෙයි.දරුවන්ගේ හැසිරීම් රටාවේ සිදුවන හදිසි වෙනස්කම් කෙරෙහි සැලකිලිමත් වීම සහ තමන් මුහුණ දෙන ගැටලු පිළිබඳව දෙමාපියන් සමඟ විවෘතව කතා කිරීමට හැකි පරිසරයක් දරුවාට සකසා දීම අත්යවශ්ය වේ. එමෙන්ම අන්තර්ජාලය ආරක්ෂිතව භාවිත කරන ආකාරය පිළිබඳව දරුවන් දැනුවත් කිරීමේ වැදගත්කම ද පොලිසිය පෙන්වා දෙයි. කිසියම් හෙයකින් දරුවෙකු පීඩාවකට ලක්ව ඇති බවට හෝ සැකකටයුතු තත්ත්වයක් පවතින බවට නිරීක්ෂණය වුවහොත්, ඒ පිළිබඳව වහාම ළඟම පිහිටි පොලිස් ස්ථානයට හෝ පොලිස් ළමා හා කාන්තා කාර්යාංශය වෙත දැනුම් දෙන ලෙසද ශ්රී ලංකා පොලිසිය ඉල්ලා සිටී.
දරුවන්ගේ ආරක්ෂාව සම්බන්ධයෙන් පොලිසියෙන් දෙමාපියන්ට උපදෙස්
