බෙන්තොට මුහුදු තීරයේ දිය නෑමට ගිය මොරටුව විශ්වවිද්යාලයේ අවසන් වසරේ ඉගෙනුම ලැබූ සිසුවෙකු ඊයේ (19) පස්වරුවේ දියවැලකට හසුවීමෙන් ජීවිතක්ෂයට පත්ව තිබේ. ඉංජිනේරු පීඨයේ අධ්යාපනය ලබමින් සිටි මෙම තරුණයා තම අධ්යයන කටයුතු නිම කිරීමට ආසන්නව සිටියදී මෙලෙස අකල් මරණයකට ගොදුරු වීම මහත් කණගාටුවට කරුණකි.මෙසේ මියගොස් ඇත්තේ යාපනය, චුන්නාගම් ප්රදේශයේ පදිංචිකරුවෙකු වූ 25 හැවිරිදි කාදීර් කාමනාදන් මිතුසන් නැමැති සිසුවාය. පොලිස් වාර්තාවලට අනුව ඔහු එම විශ්වවිද්යාලයේම සිසුවියන් දෙදෙනෙකු සමඟ බෙන්තොට ප්රදේශයේ සංචාරයක නිරත වෙමින් සිටියදී මෙම අනතුරට මුහුණ දී ඇත.මුහුදේ දිය නෑමට ගොස් විනෝද වෙමින් සිටි අවස්ථාවේදී ඔහු හදිසියේම ප්රබල දියවැලකට හසුව ගසාගෙන ගොස් තිබේ. පසුව ඔහුව දැඩි පරිශ්රමයකින් ගොඩට ගෙන වහාම බෙන්තොට රෝහල වෙත ඇතුළත් කිරීමට පියවර ගත්තද, ඒ වන විටත් ඔහු අවසන් හුස්ම හෙළා සිටි බව රෝහල් ආරංචි මාර්ග තහවුරු කරයි.සිද්ධිය සම්බන්ධයෙන් බෙන්තොට පොලිසිය වැඩිදුර විමර්ශන ආරම්භ කර ඇති අතර, මියගිය සිසුවා සමඟ පැමිණි තරුණියන් දෙදෙනාගෙන් ද ප්රකාශ සටහන් කරගෙන තිබේ. ප්රදේශයේ පවතින මුහුදු රළ සහ දියවැල් පිළිබඳව සැළකිලිමත් වන ලෙස බලධාරීන් මෙම සිදුවීමත් සමඟ යළිත් මහජනතාවගෙන් ඉල්ලා සිටියි.
බෙන්තොට මුහුදේ දිය නෑමට ගිය මොරටුව සරසවි සිසුවෙක් මරුට
