මාලදිවයින් ජනාධිපති මොහොමඩ් මුයිසු මහතා ඇතුළු විශේෂ දූත පිරිසක් සිව් දින නිල සංචාරයක් සඳහා අද (03) පස්වරුවේ කටුනායක බණ්ඩාරනායක ජාත්යන්තර ගුවන්තොටුපොළින් දිවයිනට පැමිණියහ. 2023 වසරේදී ජනාධිපති ධුරයට පත්වීමෙන් පසු මුයිසු මහතා ශ්රී ලංකාවේ සිදුකරන ප්රථම නිල සංචාරය මෙය වන අතර, ජනාධිපති අනුර කුමාර දිසානායක මහතාගේ විශේෂ ආරාධනයකට අනුව එතුමා මෙරටට සම්ප්රාප්ත විය.ගුවන්තොටුපොළ වෙත පැමිණි මාලදිවයින් ජනාධිපතිවරයා සහ ජනාධිපති ආර්යාව ඇතුළු 20 දෙනෙකුගෙන් යුත් දූත පිරිස පිළිගැනීම සඳහා අග්රාමාත්ය හරිනි අමරසූරිය මහත්මිය ඇතුළු රජයේ උසස් නිලධාරීන් පිරිසක් එක්ව සිටියහ. එළඹෙන 06 වනදා දක්වා මෙරට රැඳී සිටින ජනාධිපතිවරයා, සිය සංචාරය තුළදී දෙරට අතර සබඳතා තවදුරටත් පුළුල් කරගැනීම වෙනුවෙන් ක්ෂේත්ර ගණනාවක් ආවරණය වන පරිදි අවබෝධතා ගිවිසුම් කිහිපයකට අත්සන් තැබීමට නියමිතය.ආරක්ෂක ක්ෂේත්රයේ සහයෝගිතාව වෙනුවෙන් මාලදිවයින් ආරක්ෂක අමාත්යාංශය සහ ශ්රී ලංකාවේ ජෙනරාල් ශ්රීමත් ජෝන් කොතලාවල ආරක්ෂක විශ්වවිද්යාලය අතර පුහුණු වැඩසටහන් හා පර්යේෂණ සම්බන්ධයෙන් විශේෂ ගිවිසුමක් මෙහිදී ඇති කරගනු ලබයි. මීට අමතරව, අධ්යාපන ක්ෂේත්රයේ ප්රගමනය උදෙසා දෙරටේ අධ්යාපන අමාත්යාංශ ඒකාබද්ධව ගුරුවරුන් හා පාසල් ප්රධානීන්ට වෘත්තීය පුහුණුව ලබාදීමට අදාළ එකඟතාවකට ද එළඹීමට නියමිතව ඇත.සෞඛ්ය හා උසස් අධ්යාපන ක්ෂේත්ර නංවාලීම වෙනුවෙන් මාලදිවයින් සෞඛ්ය හා සුබසාධන අමාත්යාංශය සහ කොළඹ විශ්වවිද්යාලය අතර ශාස්ත්රීය සහයෝගිතා ගිවිසුමක් අත්සන් කිරීමට ද කටයුතු යොදා තිබේ. එමෙන්ම ශ්රී ලංකාව සහ මාලදිවයින අතර ආර්ථිකමය වශයෙන් වැදගත් වන සංචාරක ක්ෂේත්රය ප්රවර්ධනය කිරීම උදෙසා නව අවබෝධතා ගිවිසුමක් ඇති කරගැනීම මෙම සංචාරයේ ප්රධාන අරමුණක් වනු ඇත.රාජ්ය ලේඛන සහ දත්ත කළමනාකරණය විධිමත් කිරීම සඳහා දෙරටේ ජාතික ලේඛනාරක්ෂක දෙපාර්තමේන්තු අතර සහයෝගිතා ගිවිසුමක් ද මෙම සංචාරය තුළදී ක්රියාත්මක කිරීමට සැලසුම් කර ඇත. මෙය දෙරටේ ඓතිහාසික හා පරිපාලනමය සබඳතා තහවුරු කිරීමට ඉවහල් වනු ඇතැයි අපේක්ෂා කෙරේ.අවසාන වශයෙන්, දෙරටේ තරුණ පරපුරේ කුසලතා සංවර්ධනය සහ ක්රීඩා අංශයේ දියුණුව වෙනුවෙන් මාලදිවයින් තරුණ බලගැන්වීම් අමාත්යාංශය සහ මෙරට තරුණ කටයුතු හා ක්රීඩා අමාත්යාංශය අතර ද විශේෂ අවබෝධතා ගිවිසුමකට අත්සන් තැබීමට නියමිතය. මෙම සංචාරය හරහා ඉන්දියානු සාගර කලාපයේ සමීපතම අසල්වැසියන් දෙදෙනෙකු ලෙස ශ්රී ලංකාව සහ මාලදිවයින අතර රාජ්යතාන්ත්රික සබඳතාවල නව පරිච්ඡේදයක් සනිටුහන් වනු ඇත.
මාලදිවයින් ජනාධිපති මොහොමඩ් මුයිසු නිල සංචාරයක් සඳහා දිවයිනට
