වාහන ආනයනය සඳහා පැනවූ 50%ක රේගු බදු අධිභාරය බලාත්මක වීමට පෙර, ණයවර ලිපි (LC) විවෘත කිරීමේ ක්රියාවලිය තුළ කිසියම් අක්රමිකතාවක් සිදුව ඇත්දැයි සොයා බැලීමට වහාම විමර්ශනයක් පවත්වන ලෙස ශ්රී ලංකා වාහන ආනයනකරුවන්ගේ සංගමය රජයෙන් ඉල්ලා සිටී. කොළඹදී අද (21) පැවැති මාධ්ය හමුවකදී එම සංගමයේ උප සභාපති අරෝෂ රුද්රිගෝ මහතා මෙම අවශ්යතාව අවධාරණය කළේය. බදු සංශෝධන පිළිබඳ තොරතුරු කල්තියා දැනගත් ඇතැම් පිරිස් මින් අනිසි වාසි ලබාගෙන ඇති බවට ක්ෂේත්රය තුළ සැකයක් මතුව ඇත.ඩොලරයේ අගය හමුවේ පවතින ආර්ථික වටපිටාව උපයෝගී කරගනිමින්, ඇතැම් පාර්ශව මෙම බදු සහන කාලසීමාව තුළ මහා පරිමාණයෙන් වාහන ඇණවුම් කර ඇති බව උප සභාපතිවරයා පෙන්වා දුන්නේය. පූර්ව සැලසුමකින් තොරව මෙලෙස වාහන මෙරටට ගෙන්වා ප්රදර්ශනාගාර තුළ ගොඩගසා තැබීමට ඉඩ දිය නොහැකි බවත්, එය පවතින වාහන වෙළඳපොළ අර්බුදය තවදුරටත් දැඩි කිරීමට හේතුවන බවත් ඔහු සඳහන් කළේය.සමස්ත වාහන ආනයන ක්ෂේත්රයේ පැවැත්ම ආරක්ෂා කර ගැනීමට සහ සාමාන්ය පාරිභෝගිකයාට සාධාරණයක් ඉටු කිරීමට නම් මෙම මූල්ය ගනුදෙනු පිළිබඳව විනිවිදභාවයකින් යුත් කඩිනම් පරීක්ෂණයක් අත්යවශ්ය වේ. මෙමඟින් අසාධාරණ ලෙස වෙළඳපොළ ඒකාධිකාරයක් ඇති කිරීමට දරන උත්සාහයන් වැළැක්විය හැකි බවද වාහන ආනයනකරුවන්ගේ සංගමය වැඩිදුරටත් පවසයි.
වාහන ආනයන ණයවර ලිපි විවෘත කිරීමේ අක්රමිකතා පිළිබඳ පරීක්ෂණයකට ඉල්ලීමක්
