ශ්රී ලංකා ජාතික ඔලිම්පික් කමිටුවේ නව සභාපතිවරයා තෝරා පත් කරගැනීම සඳහා වූ තීරණාත්මක නිලවරණය ඊයේ (25) කොළඹ පිහිටි ඔලිම්පික් නිවහනේදී උණුසුම් මුහුණුවරකින් පැවැත්විණි. එහිදී අපේක්ෂකයින් තිදෙනෙකු අතර පැවති තියුණු තරඟයකින් අනතුරුව, වැඩි ඡන්ද සංඛ්යාවක් හිමිකර ගනිමින් මෙරට ක්රීඩා ක්ෂේත්රයේ ප්රමුඛයෙකු වන අසංක සෙනෙවිරත්න මහතා සභාපති ධුරය සඳහා තේරී පත් විය.නිලවරණයේ ඡන්ද විමසීමේ ප්රතිඵල අනුව අසංක සෙනෙවිරත්න මහතා ඡන්ද 16ක් ලබා ගනිමින් ජයග්රහණය තහවුරු කරගත් අතර, ඔහු සමඟ තරඟ වැදුණු ජස්වර් උමාර් මහතාට ඡන්ද 11ක් හිමි විය. තරඟ බිමේ සිටි අනෙක් අපේක්ෂකයා වූ ශිරන්ත පීරිස් මහතාට හිමිවූයේ ඡන්ද 2ක් පමණි. ඒ අනුව ඉදිරි වාරය සඳහා ඔලිම්පික් සම්මේලනය මෙහෙයවීමේ වගකීම සෙනෙවිරත්න මහතා වෙත නිල වශයෙන් පැවරිණි.සභාපතිවරයාට අමතරව කමිටුවේ සෙසු ප්රධාන නිලධාරීන් පත් කිරීම ද මෙහිදී සිදු කෙරුණු අතර, උපසභාපති ධුරයන් සඳහා නිලූ ජයතිලක, ප්රිතිවිරාජ් පෙරේරා, ඉක්බාල් බින් ඉසාක් සහ සරත් හේවාවිතාරණ යන මහත්ම මහත්මීන් තේරී පත් විය. සම්මේලනයේ ඉදිරි පරිපාලන කටයුතු සම්බන්ධීකරණය කරන ලේකම් ධුරය සඳහා රිෆ්ඩි ෂමින් මහතා පත් කර තිබේ.මෙම නිලවරණය මෙරට ඔලිම්පික් ක්රීඩා ක්ෂේත්රයේ නව පරිච්ඡේදයක ආරම්භයක් ලෙස සැලකෙන අතර, නව නිලධාරී මණ්ඩලය පත් වීමෙන් පසු ශ්රී ලංකාවේ ක්රීඩා අනාගතය ජාත්යන්තර මට්ටමට ඔසවා තැබීම සම්බන්ධයෙන් විශේෂ අවධානයක් යොමු කෙරිණි. ජයග්රහණයෙන් අනතුරුව නව සභාපතිවරයා ප්රමුඛ කණ්ඩායම සිය ඉදිරි සැලසුම් පිළිබඳව මාධ්ය වෙත කරුණු පැහැදිලි කිරීමට ද කටයුතු කළහ.පසුගිය කාලසීමාව පුරා මෙරට ක්රීඩා පරිපාලනය තුළ පැවති විවිධ අභියෝග මධ්යයේ මෙම පත්වීම සිදුවීම විශේෂත්වයකි. අසංක සෙනෙවිරත්න මහතාගේ නායකත්වය යටතේ ඉදිරි වසර කිහිපය තුළ ශ්රී ලංකාවේ ක්රීඩක ක්රීඩිකාවන්ට ජාත්යන්තර මට්ටමේ පුහුණුවීම් සහ පහසුකම් ලබාදීම කෙරෙහි ඔලිම්පික් කමිටුවේ පූර්ණ අවධානය යොමු වනු ඇතැයි ක්රීඩා ලෝලීහු අපේක්ෂා කරති.
ශ්රී ලංකා ජාතික ඔලිම්පික් කමිටුවේ සභාපති ධුරය අසංක සෙනෙවිරත්න මහතාට
